Бырабыыталыстыба эбии 3,6 миллиард солкуобайы сэлиэнньэ сайдыытыгар көрдө

Көрүллүбүт харчы оскуолалар, уһуйааннар тутууларыгар, өрөмүөннэригэр, мэдиссиинэ эбийиэктэригэр тиэхиньикэ, көлө атыылаһарга туһуланыа. Харчыны улаатыннарыыны «Биир ньыгыл Арассыыйа» баартыйа туруорсубута.

edersaas.ru

Эбии харчыны «Тыа сирин бүттүүн сайдыыта» судаарыстыбаннай бырагыраамаҕа көрдүлэр. «Биир ньыгыл Арассыыйа» сэкирэтээрин солбуйааччы Дмитрий Кобылкин:

— Бу бырагыраама чэрчитинэн, олоххо киириэхтээх эбийиэктэр тыа сирин олоҕун хаачыстыбатын тупсарыахтара. Тыа сиригэр куораттартан итэҕэһэ суох усулуобуйа баар буолуохтаах.

Билигин Тыа хаһаайыстыбатын министиэристибэтэ эрэгийиэннэргэ бу сууманы түҥэтиэҕэ. Тыа сирин сайдыытыгар элбэх харчыны көрүү – биһиги сүрүн сыалбыт,  –диэн баартыйа сэкирэтээрин солбуйааччыта этэр.

Харчыны икки хайысхаҕа ыытыахтара. Социальнай инфраструктураны сайыннарыыга 2,4 миллиард солкуобайы көрүөхтэрэ. Онуоха бу сууманы 22 эрэгийиэн үллэстиэҕэ. Адыгея, Алтай, Башкирия, Волгоград, Нижегородскай, Смоленскай, Томскай уобаластар уо.д.а. Бу субъектарга тоҕус оскуоланы, түөрт уһуйааны,  18 култуура дьиэтин, спорткомплекстары, балыыһалары, музейдары, гаас утахтарын, ыраастыыр эбийиэктэри өрөмүөннүөхтэрэ, тутуохтара. Ону таһынан, оскуолаҕа оптуобустары, суһал көмө массыыналарын атыылаһыахтара. Манна барытыгар  7,5 тыһыынча саҥа үлэ миэстэтэ тахсара былааннанар.

Миллиртан тахса сууманы тыа сирин ипотекатыгар көрүөхтэрэ. Онон 23 тыһыынчаттан тахса дьон олорор усулуобуйаларын тупсарар кыахтаныахтара. Тэҥнээн көрөр буоллахха, эбии көмөтө суох, тыа сирин ипотекатын 12 эрэ тыһыынча киһи ылыа этэ.

РФ премьер-миниистирэ Михаил Мишустин Бырабыыталыстыба мунньаҕар Тыа сирин сайдыытын туһунан эмиэ эттэ:

—Судаарыстыбаннай бырагыраамаларга сайаапка күн-түүн киирэ турар. Онон, эбии харчы көрүллэр. Хас биирдии дэриэбинэҕэ үчүгэй уһуйаан, оскуола баар буолуохтаах. Ону таһынан, интэриниэт, спортивнай былаһаакка, үчүгэй суол. Эрэгийиэннэр бу харчыны күүппүттэрэ ыраатта, – диир премьер-миниистир.

2021-2023 сылларга тыа сирин бүттүүн сайдыытын бырагырааматыгар  31 миллиард солкуобай бүддьүөттэн көрүллүбүтэ. Маны таһынан, тыа сиригэр туһуланар атын бырагыраамаларга өссө эбии 186 миллиард солкуобай көрүлүннэ.

Бу судаарыстыбаннай бырагыраама Уһук Илин хас биирдии эрэгийиэнигэр уу, күн курдук наадалаах. Сэлиэнньэлэр сайдыахтарын наада, онуоха эдэр дьон олохсуйара булгуччулаах.