Доруобуйа Маны аах

Бырабыыталыстыба чэпчэтиинэн туһанааччыларга төһө үбү ыытыай?

Бырабыыталыстыба чэпчэтиинэн туһанааччыларга босхо эмкэ, мэдиссиинэ тэриллэригэр уонна эмтэнэр аһылыкка 1,6 млрд тахса солкуобайы ыытыаҕа. Маннык дьаһалга Бырабыыталыстыба Бэрэссэдээтэлэ Михаил Мишустин илии баттаата.

Бу үп – 2021 сылга чэпчэтиинэн туһанааччылары босхо эминэн хааччыйыыга көрүллүбүт федеральнай бүддьүөт үбүн үллэриллэ илик саппааһа. Маннык социальнай өҥө инбэлииттэргэ бэриллэр, ол иһигэр Аҕа дойду Улуу сэриитин кыттыылахтарыгар, инбэлиит оҕолорго, Чернобыль кыттыылаахтарыгар. Эми уонна мэдиссbинэ тэриллэрин хас биирдиилэригэр тус-туһунан аныыллар.

Бу иннинэ Бырабыыталыстыба чэпчэтиинэн туһанар араҥа ылыахтаах эмин уонна тэрилин сууматын индексациялаабыта. Ити билигин ыйга биир киһиэхэ 929,8 солк. тэҥнэһэр. Маннык быһаарыы эбии үбүлээһини ирдээбитэ.

Боппуруоһу соторутааҕыта Бырабыыталыстыба мунньаҕар дьүүллэспиттэрэ. “Бу үбү эрэгийиэннэргэ хойутаппакка ыытыахтаахпыт, дьон эми-тому атыылаһалларын курдук”, — диэн бэлиэтээтэ Михаил Мишустин. 2021 сылга босхо эмкэ 38,7 млрд солкуобай көрүллүбүтэ.

РФ Бырабыыталыстыбатын саайтыттан

Бэлэмнээтэ Женни Стрюкова

Хаартыска: тустаах саайтан

0
0