Бэлиитикэ Сүрүн Үөрэх уонна наука

Бырабыыталыстыба аан дойду таһымнаах научнай-үөрэтэр кииннэри сүүмэрдиир кыайыылаахтар куонкурустарын испииһэгин бигэргэттэ

Аан дойду таһымнаах биэс научнай-үөрэтэр киини (НОЦ) Арассыыйатааҕы сүүмэрдээһин кыайыылааҕынан биллэрдилэр, кинилэр дойду хааһынатыттан көрүллэр граннарга кыттар кыахтаахтар. Ол туһунан дьаһалга Бырабыыталыстыба бэрэссэдээтэлэ Михаил Мишустин илии баттаата.

edersaas.ru

Научнай-үөрэтэр кииннэр (НОЦ) – экэниэмикэҕэ быһаччы сыһыаннаах хампаанньалары кытта наука уонна үөрэх эйгэтигэр  үлэлэһэр эрэгийиэннэр икки ардыларынааҕы ураты тэрилтэлэр.

Маннык 15 киин ситимин олохтооһун туһунан соругу дойду бэрэсидьиэнэ Владимир Путин туруорбута. Итинтэн уонун Бырабыыталыстыба эрдэ быһаарбыта. Саҥа дьаһалынан бүтэһик биэс киин бигэргэннэ.

Быйылгы сылга маннык кииннэр кыайыылаахтарынан буоллулар:

“Хоту: туруктаах сайдыы территорията” (Чукотка автономнай уокуруга, Камчатскай кыраай, Магадан, Сахалин уобаластара уонна Саха Өрөспүүбүлүкэтэ көҥүлээһиннэринэн тэрилиннэ);

“Енисей Сибиирэ” (Красноярскай кыраай, Тыва уонна Хакасия Өрөспүүбүлүкэлэрэ көҕүлээһиннэринэн);

“Байкал” (Иркутскай уобалас уонна Бурятия Өрөспүүбүлүкэтэ көҕүлээһиннэринэн);

«МореАгроБиоТех» (Севастополь уонна Крым Өрөспүүбүлүкэтин көҕүлээһиннэринэн);

Соҕурууҥҥу Арассыыйа эрэгийиэннэр икки ардыларынааҕы научнай-үөрэтэр киинэ (Волгоградскай уобалас, Красноярскай кыраай уонна Ростовскай уобалас көҕүлээһиннэринэн).

Бу ааттаммыт кииннэр экология уонна килиимэт, айылҕаны сөптөөхтүк туһаныы, саҥа энергоносителлэри, биотехнологияны үөрэтии, аһы-үөлү хааччыйыы боппуруостарын наукатыгар интэриэстээхтэр.

Граннар, тустаах кииннэр сайдыыларын былааныгар киирбит бырайыактар олоххо киириилэрин түмүгүнэн төлөнүөхтэрэ. Эһиил тустаах өйөбүлгэ анаан 1,66 млрд солк. үбү угуохтара.

Тустаах быһаарыы эрэгийиэннэр научнай кыахтарын бөҕөргөтүөҕэ уонна Арассыыйа учуонайдарын инновационнай оҥоһуктарын кэмиэрсийэлээһинин түргэтэтиэҕэ. Бу туһунан РФ Бырабыыталыстыбатын саайтыгар суруллар.

 

Хаартыска: https://roskvartal.ru

 

0
0