Саха Өрөспүүбүлүкэтин Бырабыыталыстыбатын ыам ыйын 26 күнүгэр ыытыллыбыт сүбэ мунньаҕар «Табаны иитии туһунан» сокуон барыла өйөннө.
edersaas.ru
Сокуон барылын мунньах көрүүтүгэр тыа хаһаайыстыбатын миниистирэ Александр Атласов киллэрдэ. Табаны иитии салаатын сокуонунан өйөөһүн сүрүн сыалынан Саха сиригэр олорор Хотугу төрүт олохтоох аҕыйах ахсааннаах омуктар төрүт үгэстэрин, култуураларын сайыннарыы буоларын бэлиэтээтэ.
– Сокуон саҥа барыла федеральнай сокуоннарга сөп түбэһиннэрэн оҥоһулунна. Билигин үлэлиир 1997 с. ылыллыбыт «Саха Өрөспүүбүлүкэтигэр табаны иитии туһунан» сокуону тупсарыыга, өйөбүл ырычаахтарын тупсарыыга ананна, – диэтэ миниистир.
Саҥа сокуон барылыгар ураты уйан экологическай систиэмэлээх таба мэччирэҥин харыстааһыҥҥа итиэннэ таба бородууксуйатынан нэһилиэнньэни хааччыйыыга эмиэ улахан болҕомто ууруллар. Билигин бу салааҕа идэтийэр 106 хаһаайыстыбаҕа 37 мөл. гектар сир сыһыарыллан сылдьар. Таба биригээдэлэригэр 1 295 киһи, ол иһигэр 1050 табаһыт, 244 чуумсук үлэлиир. Кэлиҥҥи сылларга таба ахсаана көҕүрээһинэ тохтотуллубут. Холобур, быйыл сыл саҕаланыытыгар 152 тыһ., былырыыҥҥы сыл туһааннаах кэминээҕэр 3,8 %-ынан элбэх, таба баара бэлиэтэммитэ. Ыам ыйын 1 күнүнээҕи туругунан, таба ахсаана 6,7 %-ынан эбиллибит.
Саҥа сокуон барыла 22 ыстатыйалаах, судаарыстыба өйөбүлүн принциптэрэ, сүрүн хайысхалара чопчу ыйыллыбыттар, племенной уонна бэтэринээринэй үлэлэр тиһиктэрэ, адьырҕа кыыллары утары охсуһуу дьаһаллара, таба хаһаайыстыбаларын эбээһинэстэрэ, мэччирэҥ харыстабыла, табаһыттар сынньаныылара уонна эмтэниилэрэ, каадырынан хаачыллыы уо.д.а. киирбиттэр. Бырабыыталыстыба чилиэннэрэ сокуон барылын өйөөтүлэр итиэннэ аны Ил Түмэн көрүүтүгэр ыыттылар диэн Ил Дархан уонна Бырабыыталыстыба дьаһалтатын пресс-сулууспата иһитиннэрэр.
Раиса Сибирякова, «Саха сирэ» edersaas.ru