Бырабыыталыстыба 500 мөл. солкуобайы үөрэнээччилэргэ саҥа туристическай бырагыраамаҕа ыытыаҕа

Быйыл Арассыыйаҕа үөрэнээччилэргэ туризмы тэнитиигэ анаммыт саҥа бырагыраама киириэҕэ.

Сүрүн сыала – оҕолору дьоҕус айан көмөтүнэн төрөөбүт дойдуларын устуоруйатын билиһиннэрии. Бу сыалга 500 мөл. солкуобайы түҥэтэр, ону эрэгийиэннэргэ биэрэр туһунан уураахха Бырабыыталыстыба Бэрэссэдээтэлэ Михаил Мишустин илии баттаата.

Субсидиялары оскуола саастаах оҕолорго анал турпакеттары үлэлэтэр 18 эрэгийиэн ылыаҕа. Бу эрэгийиэннэр ортолоругар – Адыгея, Башкортостан, Ставрополье кыраайа, Вологодскай, Калининград, Курскай, Новгород, Сахалин, Челябинскай уонна Ярославль уобаластара.

“Быйыл 5-9 кылаастар 100 тыһыынчаттан тахса үөрэнээччилэрэ биир эбэтэр хас да хонуктаах, интэриэһинэй экскурсиялыыр бырагыраамаларынан уонна табыгастаах усулуобуйанан айаҥҥа барыахтара”, — диэн бэлиэтээтэ Михаил Мишустин вице-премьердэри кытта тохсунньу 10 күнүгэр буолбут мунньахха.

Бырабыыталыстыба Бэрэссэдээтэлэ вице-премьер Дмитрий Чернышенкоҕа пилотнай бырагыраама үлэтин көдьүүстээхтик тэрийэн, элбэх эрэгийиэни хабан, үгүс үөрэнээччи култуурунай-саҥаны биллэрэр бырагыраамаларынан туһанарыгар сорудахтаата.

Саҥа бырагыраама “Туризм уонна ыалдьытымсах буолуу индустрията” национальнай бырайыак чэрчитинэн олоххо киириэҕэ.

РФ Бырабыыталыстыбатын саайтыттан

Бэлэмнээтэ Женни Стрюкова

Хаартыска: https://www.google.com/amp/s/www.m24.ru/amp/news/vlast/29032021/158610