Бырабыыталыстыба Бүлүүгэ уонна Жатайга отчуоттарын түмүгүнэн мунньахтаата
Бырабыыталыстыба бэрэссэдээтэлин бастакы солбуйааччы Алексей Стручков олунньу 22 күнүгэр бырабыыталыстыба Бүлүү улууһугар уонна Жатайга отчуотун түмүгүнэн киирбит боппуруостары быһаарыыга министиэристибэлэр уонна биэдэмистибэлэр салайааччыларын кытта оробуочай сүбэ мунньаҕы ыытта.
Киирии тылыгар Алексей Стручков Бүлүү улууһугар отчуокка бары 22 нэһилиэккэ 1,5 тыһыынча олохтоох кыттыбытын бэлиэтээтэ. “Бүлүү улууһун олохтоохторо бырабыыталыстыба отчуоттарыгар көхтөөхтүк кытыннылар. Олохтоохтору доруобуйа харыстабылын, тыа хаһаайыстыбатын уонна үөрэхтээһини кытта сибээстээх боппуруостар долгуталлар”, — диэтэ бастакы вице-премьер.
Доруобуйа харыстабылын эйгэтигэр нэһилиэнньэ Бүлүүгэ оройуон киин балыыһатын уонна нэһилиэктэргэ биэлсэр пууннарын тутууну туоһуластылар.
Доруобуйа харыстабылын миниистирэ Елена Борисова оройуон киин балыыһатын саҥа дьиэтин 2021 сылга киллэрэр былааннаахтарын эттэ.
Алексей Стручков тустаах министиэристибэҕэ диспансеризацияҕа уонна мэдиссиинэ өҥөтүн хаачыстыбатын тупсарыыга үлэлииллэригэр сорудахтаата.
Үөрэхтээһиҥҥэ олохтоохтор Бүлүү куоратыгар саҥа оскуоланы уонна оҕо саадын тутууну уонна Кыһыл Сыырга оҕо саадын тутууну саҕалааһыны ыйыталастылар. Бүлүүгэ тутулла турар оҕо саадын быйыл атырдьах ыйыгар киллэрэргэ соруктаналлар. Ону сэргэ Кыһыл Сыыр оҕо саадын бырайыагын уонна сметатын докумуонун бэлэмниэхтэрэ.
Маны сэргэ быйыл Бүлүүгэ “АЛРОСА” хампаанньаттан киирэр дивиденинэн тутуута саҕаламмыт оройуоннааҕы Култуура дьиэтин тутуу түмүктэниэҕэ.
Оттон “Жатай” куорат уокуругар ыытыллыбыт отчуот түмүгэр тохтууругар Алексей Стручков быйыл федеральнай бүддьүөт суотугар сөтүөлүүр бассейн тутуллара күүтүллэрин эттэ.
Бастакы вице-премьер бырамыысыланнас министиэристибэтигэр “Хаҥалас” ТОР резиденэ буолар баҕалаах Жатайдааҕы тимир конструкцияларга собуот бырайыактыыр үлэтин үөрэтэргэ сорудахтаата.
Сүбэ мунньах түмүгүнэн бастакы вице-премьер Алексей Стручков нэһилиэнньэттэн отчуот кэмигэр киирбит бары ыйытыылар уонна этиилэр сиһилии үөрэтиллиэхтээхтэр уонна түмүк боротокуолга толорууга киллэриллиэхтээхтэр диэтэ.
СИА.