Бырабыыталыстыба бэрэссэдээтэлин үһүс солбуйааччынан Игорь Никифоров оннугар Кирилл Бычков диэн Москва уобалаһын сайдыытын корпорациятын дириэктэрэ ананна. Бүгүн Ил Түмэн пленарнай мунньаҕар норуот дьокутааттара Ил Дархан Айсен Николаев киллэрбит кандидатуратын өйүүллэрин биллэрдилэр.
Кирилл Евгеньевич 2014 с. Дьокуускайга кытаанах бөҕү хомуйар, иккиһин оҥорон таһаарар технопаарка тутар санаалаах кэлэ сылдьыбыта. РФ бэрэсидьиэнигэр бастайааннай бэрэстэбиитэлистибэни, Дьокуускай куоран мэрин Айсен Николаевы кытары дуогабар түһэрсибитэ. Оччолорго Кирилл Евгеньевич “Black Swan Capital Partners Limited” управляющай партнерунан үлэлии олороро. Бу дуогабар түһэрсиигэ кини «Якутскэкосети» хампаанньа акционердарын бэрэстэбиитэлин быһыытынан сылдьыбыта. Оттон былырыын Москва уобалаһын сайдыытын корпорациятын дириэктэринэн үлэлии олорон, Саха сирин сайдыытын корпорациятын салайааччытын Петр Алексеевы кытары бииргэ үлэлэһэргэ илии баттаспыта.
Вице-премьер дуоһунаһыгар ананнаҕына инновациянан, инвестициянан, судаарыстыба уонна чааһынайдар бииргэ үлэлээһиннэринэн, тутуунан, цифровой экономиканан, аччыгый, орто бизнес эйгэтин, туризмы сайыннарыынан дьарыктаныаҕа.
Ыспыраапка:
Бычков Кирилл Евгеньевич
1974 с. атырдьах ыйын 24 күнүгэр Москваҕа төрөөбүтэ;
1991-1996 сс. – Москватааҕы норуоттар икки ардыларынааҕы сыһыан судаарыстыбаннай институтун устудьуона;
1996-1998 сс. – “Сиданко” ААУо менеджеринэн, старшай экономиһынан, сүрүннүүр менеджеринэн үлэлээбитэ;
1999 с. – “Русско-Балтийская энергетическай компания” отделын начальнигын солбуйааччы;
1999-2004 сс. – “Каргилл Энтерпрайзес ИНК” фирма Москватааҕы бэрэстэбиитэлистибэтигэр үлэлээбитэ;
2004-2006 сс. – “Интерпайп” корпорация управлениетын начальнига, дириэксийэтин дириэктэрэ;
2006-2008 сс. – “ГЕО Альянс” концерн бэрэссэдээтэлэ;
2009-2011 сс. – Тверь уобалаһыгар губернатор сүбэһитинэн үлэлээбитэ;
2011-2016 сс. – “Сатройтрансгаз”, “Баштрейд” тэрилтэлэргэ үлэлээбитэ;
2016-2017 сс. – Москва уобалаһын бырабыыталыстыбатын бэрэссэдээтэлин солбуйааччытын сүбэһитэ;
2017-2018 сс. – Москва уобалаһын сайдыытын корпорациятын генеральнай дириэктэрэ.
Аграфена КУЗЬМИНА, “Саха сирэ” хаһыат.