Бүгүн, муус устар 26 күнүгэр, Быраатыы куораттар аан дойдутааҕы күннэрэ бэлиэтэнэр.
edersaas.ru
Бу суолталаах бэлиэ күнү муус устар бүтэһик өрөбүлүгэр Бырааттыы куораттар аан дойдутааҕы федерацията олохтообута. Тэрилтэ муус устар 28 күнүгэр 1957 с. Парижка тэриллибитэ. Бырааттыы куораттар историяҕа, култуураҕа, экэниэмикэҕэ үөрэхтээһиҥҥэ, мэдьиссиинэҕэ, онтон да атын олох бары эйгэтигэр туһуламмыт боппуруостарга бииргэ үлэлээһини ыыталлар.
Аныгы үйэ буолан, сибээс бары көрүҥүн нөҥүө, Бырааттыы куораттар аан дойдутааҕы федерацията 160 судаарыстыба 3500 куораттарын сомоҕолоото. Онтон Арассыыйа 100-тэн тахса куората аан дойду 200 куораттарын кытта ыкса сибээһи олохтоото.
Саха сиригэр бырааттыы куораттары кытта ыкса сибээһи бастакынан Дьокуускай куорат олохтообута. Билигин Саха сирин 8 улууһа аан дойду 15 куоратын кытта бырааттыы сыһыаннаах.
Дьокуускай куорат бииргэ үлэлээһини олохтообут бырааттыы-куораттара:
- АХШ Фэрбанкс к. (1989 г.) – Килиимэтин усулуобуйатын кытта история, култуура, үгэс сибэстиир. Аҕа дойду Улуу сэриитин кэмигэр икки куорат икки ардыгар Аляска-Сибиир туһаайыынан байыаннай сөмөлүөттэр сырыылара олохтонон, союзник быһыытынан АХШ-тан кыайыыны уһансар көмө кэлэрэ.
- Япония Мураяма к. (1992 г.). — Сир хамсааһыныгар уонна цунами кэмигэр ыар охсууну ылбыта. Бу куорат эмсэҕэлээбитигэр Саха сирин олохтоохторо харчынан көмөлөспүттэрэ.
- Канада Йеллоунайф к. (1993 г.). — Алмаас промышленноһа бу икки куораты ыкса холбообута.
- Соҕуруу Корея Чханвон к. (1995). — Аатырбыт Samsung и LG Electronics корейскай корпорациялар дойдулара. Онон улахан интэриэһи үөскэтэр куорат.
- Кытай Хэйхэ к. (2001 г.). — Эргиэн уонна экэниэмикэ киинэ. Аан дойду дьыалабыай эргимтэтэ манна мустар куората буолан, бииргэ үлэлээһиҥҥэ интэриэс улахан.
- Кытай Харбин к. (2008 г.) – Арассыыйаны кытта ыкса сибээстээх буолан, эргиэн салаатыгар муҥутуур сайдыылаах куорат.
- Германия Дармштадт к. – Сайдыылаах саҥа технология уонна наука киинэ.
- Греция Олимпия к. (2012 г.) – Олимпийскай оонньуулар үөскээбит дойдулара. «Азия оҕолоро» V Норуоттар икки ардыларынааҕы спортивнай оонньуулар аһыллыыларын сиэригэр-туомугар куорат дэлэгээссийэтэ кыттыыны ылбыта.
Елена ПОТОЦКАЯ, «Саха сирэ» хаһыат, edersaas.ru.
Хаартыскаҕа: «Дьокуускай куорат бырааттыы куораттара» скульптурнай композиция (Сергей Саркисов түһэриитэ).