Үрдүк технологиялаах аныгы хирургия сайдыыта – Мэдиссиинэ национальнай киинин дьоһун суолталаах соруктарыттан биирдэстэрэ. Ол да иһин, улахан болҕомто Киин үлэһиттэрин аныгы ньымаларга быраактыкаҕа үөрэтиигэ уонна дойду сүрүннүүр исписэлиистэрин кытары бииргэ үлэлээһиҥҥэ ууруллар.
edеrsaas.ru
Мэдиссиинэ национальнай киинэ иһитиннэрбитинэн, от ыйын 21-22 күннэригэр бу Киин Перинатальнай киинин гинекологияҕа отделениетыгар “Лапароскопическай гинекологияҕа аныгы көрүүлэр” маастар-кылаас ыытылынна. Маастар-кылаас биир уратытынан Москваттан кэлбит эксперт, мэдиссиинискэй наука доктора, бэрэпиэссэр, РФ үтүөлээх бырааһа, РФ бырабыыталыстыбатын бириэмийэтин лауреата, репродуктологтар Арассыыйатааҕы ассоциацияларын вице-бэрэсидьиэнэ Александр Анатольевич Попов тус бэйэтинэн кыттыыта буолла.
Икки күн ыытыллыбыт маастар-кылааска Мэдиссиинэ национальнай киинин, Өрөспүүбүлүкэтээҕи 2 №-дээх балыыһа, өрөспүүбүлүкэтээҕи килиниичэскэй балыыһа гинекологтара кытыннылар. Уустук эндометриозтаах 6 ыарыһахха эпэрээссийэни ситиһиилэхтик оҥордулар.
Репродукция салаатыгар, эндоскопическай хирургияҕа үгүс уопуттаах Александр Поповы кытары икки күн эпэрээссийэ саалатыгар бииргэ үлэлээһин – биһиги быраастарбытыгар сэдэхтик бэриллэр түгэн. Быраастар аныгы технологияларга элбэх билиини уонна уопуту ыллылар, урут быһаарыыны ыларга уустук түбэлтэлэри сиһилии дьүүллэстилэр. Инникитин биһиги гинекологтарбыт лапапроскопия уустук эпэрээссийэлэрин бэйэлэрэ оҥорор буолуохтара.
БЫҺААРЫЫ:
Эндометриоз — төрүүр саастаах дьахталлар 10 бырыһыаннара (ол эбэтэр аан дойду 176 мөлүйүөн олохтооҕо) ыалдьар ыарыылара. Бу ыарыы хаамыыта төһө ырааппытыттан уонна дириҥээбититтэн тутулуга суох, лапароскопия эндометриоһы эмтииргэ хирургия биир сүрүн ньымата. Лапароскопия көмөтүнэн ыарыы көрдүгэнэ үчүгэйдик көстөр, лапароскопия туһаныллыбыт эпэрээссийэтин кэнниттэн түргэнник үтүөрэллэр.
Надежда ЕГОРОВА, «Саха сирэ», edеrsaas.ru