Быраастар эбии төлөбүрү от ыйыгар уонна атырдьах ыйыгар эмиэ ылыахтара

Бүгүн дойду бэрэсидьиэнэ Владимир Путин быһа эпииргэ олохтоохторго анал этиилээх таҕыста. 

Манна бэрэсидьиэн дойду миэдиктэригэр махтанна, пандемияны бохсууга быһаарар оруоллаахтарын уонна эпидемияҕа түргэнник дьаһанан үлэлииллэрин бэлиэтээтэ. Маны сэргэ: «Кинилэри өйүүр — биһиги эбээһинэспит», — диэн эттэ.

Коронавируһу бохсууга үлэлиир 350 тыһыынча миэдиккэ, ол иһигэр 71 тыһыынча бырааска от ыйыгар уонна атырдьах ыйыгар федеральнай эбии төлөбүрү эмиэ ылалларын туһунан иһитиннэрдэ. Социальнай үлэһиттэргэ эбии төлөбүр салгыы эмиэ көрүллэр.

Манна диэн эттэххэ, бэрэсидьиэн эбии төлөбүр нолуоктан босхоломмутун, ол эрээри уоппуска ааҕыллыытыгар учуоттанарын эттэ.

edersaas.ru