Сэтинньи 20 күнүгэр СӨ Судаарыстыбаннай Мунньаҕын (Ил Түмэн) пленарнай мунньаҕар доруобуйа харыстабылын тирээн турар боппуруостарын дьүүллэстилэр.
Ол иһигэр, өрөспүүбүлүкэҕэ эмчиттэр ахсааннарын, балыыһалары, медицинскэй пууннары аҕыйатыы боппуруоһа болҕомтоҕо ылылынна.
СӨ бырабыыталыстыбатын бэрэссэдээтэлэ Владимир Солодов: “Арктикаҕа биир да эмчит миэстэтин сарбыйыахпыт суоҕа диэн бэйэбэр эппиэтинэһи сүгэн туран, иһитиннэриэхпин сөп. Арктика зонатыгар эмчиттэр бары миэстэлэригэр хаалыахтара.
Уопсайынан, быраастар ахсааннарын 69-70 киһинэн улаатыннарар былааннаахпыт. Медицинскэй өҥө хаачыстыбата үксүгэр төһө санитар уонна медицинскэй сиэстэрэ үлэлиириттэн буолбакка (биллэн турар, ити эмиэ суолталаах), быраастар ахсааннарыттан эмиэ тутулуктаах. Саха сирин бырабыыталыстыбата быраастар ахсааннарын элбэтэрин сэргэ, поликлиникалар, биэлсэр-акушер пууннарын уонна быраас амбулаторияларын техническэй сэбилэниилэрин уонна тэриллэринэн хааччыллыыларын үрдэтэр былааннаах”, — диэтэ.
Манна даҕатан эттэххэ, СӨ Доруобуйа харыстабылын министиэристибэтин чахчытынан, 2012 сылтан өрөспүүбүлүкэҕэ “Тыа сирин доктора” федеральнай бырагырааманан – 770-тан тахса быраас; “Тыа сирин биэлсэрэ” өрөспүүбүлүкэтээҕи бырагырааманан – 22 исписэлиис; “Тыа сирин биэлсэрэ” федеральнай бырагырааманан — 39 эмчит (2018 сылтан) үлэлиир. Кинилэртэн тыа сиригэр 640-ча, куорат тииптээх бөһүөлэктэргэ – 130-ча, кыра куораттарга – 43, Арктика зонатыгар 150-ча бардылар.
Надежда ЕГОРОВА, “Саха сирэ” хаһыат, edersaas.ru