Бырааска көмөлөһөр технологияны туһаналлар. Дьэ, туох технология киирбитий?
Саха сиригэр мэдиссиинэҕэ көмөлөһөр саҥа сүүрээннэр киирбиттэрэ кэрэхсэбиллээх. Технология хайдах сайдарын “sciveria” хампаанньа сайдыыга отделын салайааччыта Юрианна Захарова “Талбан” биэриигэ кэлэн кэпсээбититтэн иһиттибит. Тыҥа ыарыытын быһаарыыга идэтийбит хампаанньа хамсык тураатын кытта, бу дьаҥы бохсууга үлэтин уларытан тэрийбит. Маннык ньыманан коронавирус тыҥаны сиэһинин быһаарыы Москваҕа уонна Саха сиригэр саҕаланан эрэрэ кэрэхсэнэр. Бу тэрил диагноһы 96 % сөпкө туруорарын үгүс көрөөччү кэрэхсээбит буолуохтаах.
Бу, дьиҥэ, билигин олус наадалаах, ыалдьыбыт дьон түһэргэ туруорсар, эрэнэр КТ-лара сөпкө холбоммут буоллаҕына, түһэрии (снимок) тута хампаанньаҕа тиийэр эбит. Кииннэммит биир тиһик буолан, диагноһы туруоруу бэрт түргэник ыытыллар. Ити ыарахан ыарыһаҕы түргэнник эмтииргэ көмөлөһөр. Ол курдук, быраас тыҥа төһө эмсэҕэлээбитин быһаччы көрөр буолбут, тоҕо диэтэххэ, снимок ону кыһылынан көрдөрөн биэрэр. Үлэ түргэтиир, ыары быһаарыллар, элбэх киһи көрөр кыахтанар. Билигин хампаанньа хамсык кэмигэр өрөспүүбүлүкэбит судаарыстыбаннай тэрилтэлэригэр бу тиһиктэрин босхо биэрэ олорор. Чааһынай балыыһалары да кытта үлэлиир баҕалаахтар. Бу технологияҕа рентген-быраастар үлэлэһэллэр.
Сонун технология тахсыбытын атын эрэгийиэннэр истэ охсон, кэрэхсээбиттэр. Сахалины, Камчатканы, Сведловскайы кытта кэпсэтии ыытылла турар. Быраастар үлэлэрин чэпчэтээри оҥоһуллубут тэрил Саха сирин олохтоохторо ыарахан коронавирус дьаҥыттан түргэнник эмтэнэллэригэр көмөлөһүөҕэ.
Бэлэмнээтэ Женни Стрюкова
Хаартыска : интэриниэттэн