Сырдык тыыннаах Маай бырааһынньыгар хас да күн үөрэ-көтө сынньанныбыт эрээри, хомойуох иһин, сорох дьон аһара арыгылаан, харах уутугар, иэдээҥҥэ тиийдилэр. Ол содула бэйэлэригэр эрэ буолбакка, чугас дьонноругар уонна эмсэҕэлээбиттэргэ эмиэ дьайдаҕа…
СӨ ИДьМ-тын пресс-сулууспата иһитиннэрбитинэн, өрөспүүбүлүкэ араас улуустарыгар бырааһынньык күннэргэ арыгылааһын түмүгэр, ыар буруйу оҥоруу хас да чахчыта таҕыста.
Ол курдук, Дьокуускай куорат балыыһатыгар 17 кыбаартал оройуонугар баар биир дьиэттэн быһаҕынан түөскэ анньыллыбыт 34 саастаах киллэрбиттэр. Бу ыар буруйу оҥорууга уорбаланан, Чурапчыттан төрүттээх 32 саастаах дьахтар тутуллубут.
Мииринэйгэ эдэр дьахталлар «разборкаласпыттар»: Бурятияттан төрүттээх 30 саастаах дьахтар олохтоох 29 саастаах дьахтары моонньугар уонна санныгар быһаҕынан анньыбыт.
Ленскэйгэ 52 саастаах дьахтар 29 саастаах билэр дьахтарын быһаҕынан анньыбыт.
Чурапчыга 63 саастаах киһини 52 саастаах атаһа быһаҕынан анньыбыт. Уорбаланааччы урут киһини өлөрөн сууттана сылдьыбыт эбит.
Сунтаарга ханна да үлэлээбэт 40 саастаах киһи 42 саастаах билэр киһитин сүрэххэ быһаҕынан анньыбыт.
Горнайга 29 саастаах киһи 31 саастаах киһини быһаҕынан искэ анньыбыт.
Бу чахчылар барыта арыгы иһэ олорон, кыыһырсыы түмүгэр тахсыбыттар.
Сотору Улуу Кыайыы күнүн бэлиэтиэхпит. Маннык сибэтиэй бырааһынньыгы кытаатан бэйэ бодотун тардынан бэлиэтиэххэйиҥ!
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.