Быйыл СӨ Айылҕа харыстабылын министиэристибэтэ төрүттэммитэ 25 сылын көрсө Судаарыстыба экологияҕа кэтэбилин Мэҥэ Хаҥалас улууһунааҕы иниспиэксийэтэ (начаалынньык Антонина Никитина) үлэни-хамнаһы күүскэ тэрийэн ыытар.
edersaas.ru
Айылҕа харыстабылын үлэһиттэрэ бу сыл 10 ыйын иһигэр 77 рейдэни ыыппыттар. Итинтэн кыылы-сүөлү көҥүлэ суох өлөрүүнү, булт быраабылатын тутуһууга 68-та бэрэбиэркэлээбиттэр. Тэҥнээн көрдөххө, былырыын 61 хонтуруоллуур-кэтээн көрөр рейдэ тэриллибит. Итинтэн булт уонна ураты харыстанар сир режимин тутуһууга 50 рейдэ оҥоһуллубут. Былырыын булт быраабылатыгар 83 кэһии тахсыбыт буоллаҕына, быйыл 250 кэһии бэлиэтэммит. Хомойуох иһин, быраабыланы кэһии аччаабат.
Ураты харыстанар сирдэргэ эмиэ болҕомто ууруллар. Ол курдук, маннык сирдэр эрэсиимнэрин кэһиигэ 9 киһи административнай миэрэҕэ тардыллыбыт. Онон “хамсыыр харамай эйгэтигэр хоромньуну оҥоруу иһин” 3 ирдэбил(415 тыһ.солк.) түспүт.
Экологтар бэлиэтииллэринэн, быйыл Мэҥэ Хаҥалас улууһун сиригэр-уотугар туртас элбээбит. Кэбиһиилээх оттору сииллэр эбит. Лицензиялаах дьон бултаан баран, докумуоннарын толорон туттарыахтаахтар. Күһүҥҥүлэри аҕыйах киһи отчуоттаабыт.
Начаалынньык А.Никитина бэлиэтииринэн, Мэҥэ Хаҥалас улууһа суола-ииһэ үчүгэй буолан, хас да улууһу кытта кыраныыссалаһарынан, Дьокуускайтан чугаһынан ордук суол аһыллыбыт кэмигэр уонна атырдьах-балаҕан ыйдарыгар манна кэлэн бултаан ааһар дьон олус элбэх. Дьон үчүгэй тиэхиньикэлээх буолан, киһи тиийбэт да сирдэригэр тиийэллэр. Онон булт быраабылатын тутуһуннарыыга күүстээх үлэ барара ирдэнэр. Хонтуруоллуур үлэни өссө күүһүрдүөхтэрэ.
Женни Стрюкова, edersaas.ru
Хаартыскаҕа: А.Никитина