Саҥа дьыл, Ороһооспо киһи аймахха саамай күүтүүлээх, үөрүүлээх бырааһынньыктар. Ол эрээри, аһыы утаҕы сөбүлээн иһээччилэр, атын дьон баайыгар-малыгар ымсыырааччылар баалларын тухары, буруйу оҥоруу син биир тахса туруо. Хомойуох иһин, олохпут кырдьыга оннук. Биһиги сынньанар кэммитигэр быраабы араҥаччылыыр уорганнар күүһүрдүллүбүт режиминэн үлэлээн, сыппакка-олорбокко, быһылаан тахсыбыт, буруй оҥоһуллубут сирдэригэр күн аайы кэриэтэ сырыттылар.
Вера МАКАРОВА, «Саха сирэ», https://edersaas.ru/
Киһи тыыныгар туруу
Усуйаана улууһун Хаһааччыйа сэлиэнньэтигэр тохсунньу 1 күнүгэр балыыһаҕа хонноҕор быһаҕынан анньыллыбыт 27 саастаах киһи киирбит. Эдэр киһи тыына балыыһаҕа быстыбыт. Бу ыар буруйу оҥорууга урут сууттана сылдьыбатах 34 саастаах киһи уорбаланан тутуллубут. Кини быһаарбытынан, бырааһынньыгы бэлиэтии олорон кыыһырсыбыттар.
Мирнэй куоракка тохсунньу 1 күнүгэр биир кыбартыыраҕа 47 саастаах киһи өлүгүн булбуттар. Түөһүгэр, илиитигэр-атаҕар быһаҕынан анньыллан өлбүт. Уорбаланааччы быһыытынан, өлүөхсүт 31 саастаах ойоҕо тутуллубут. Ыар буруй эмиэ итирдэр утах дьайыытынан уонна кыыһырсыы түмүгэр оҥоһуллубут. «Суһал көмөнү» дьахтар бэйэтэ ыҥырбыт да, кыайан быыһаабатахтар.
Алдан куоракка тохсунньу 2 күнүгэр, сарсыарда 5 ч. 20 мүн. саҕана биир дьиэ таһыттан 29 саастаах киһи өлүгүн булбуттар. Саанан көхсүгэ ытан өлөрбүттэр. Уорбаланааччы — өлүөхсүт билэр киһитэ. Эмиэ итирэн баран кыыһырсыы түмүгэр, ити ыар буруй оҥоһуллубут.
Полицейскайдары өлөрө сыспыт
Өлүөхүмэҕэ итирик суоппар ГИБДД иниспиэктэрдэриттэн куота оонньуу сылдьан, холуобунай дьыалаҕа эрилиннэ.
Ол курдук, тосхунньу 2 күнэ үүммүт түүнүгэр 23 саастаах уол «Магнит» кафе таһыгар «Тойота Королла» массыынатыгар итирик олорон, ГИБДД иниспиэктэрдэрэ докумуонун көрдөрөрүгэр эппиттэригэр, массыынатын ааныттан тутуспут полицейскайы соспутунан, 100-кэ миэтэрэни барбыт. Иниспиэктэр хайа эрэ түгэҥҥэ массыына аанын ыһыктан, суол кытыытыгар охтубут.
Иккис иниспиэктэр «Лада» сулууспатын массыынатынан кэнниттэн эккирэппит, онуоха куотан испит суоппар уруулун сатаан туппакка, массыыната төттөрү эргийбит. Полицейскай ойон тиийэн, массыына аанын аһан, күлүүһүн араара сатаабытыгар, суоппар салгыы айаннаабыт. Иниспиэктэр сол курдук массыына үктэлигэр тирэммитинэн, ааныттан тутуспутунан, балтараа километр курдугу айаннаабыттар.
Суоппар ГИБДД иниспиэктэрин соннук «тиэйбитинэн», дьиэтигэр тиийбит уонна ойон киирэн, быһах ылаат, сүүрэн тахсан, полицейскайдар иннилэригэр сууралаабыт. Ийэлээх аҕата уонна ойоҕо сүүрэн тахсан, уолларын тохтоппотохторо-туппатахтара буоллар, туох алдьархай тахсыа биллибэт.
Бу чахчынан РФ Холуобунай кодексатын 318-с ыст. 1 чааһынан холуобунай дьыала тэриллибит. Ол эбэтэр, былаас бэрэстэбиитэлигэр дуоһунаһын эбээһинэһин толорор кэмигэр күүһү туттуу уонна күүһү туттууга сорунуу бэлиэтэ баарынан.
Полиция оперативниктара төһө уорууну, талааһыны, халааһыны арыйбыттарын сарсын ааҕаарыҥ.
Вера МАКАРОВА, «Саха сирэ», https://edersaas.ru/