Бырааһынньык өрөбүллэригэр халлааммыт биллэ сылыйан, дьон-сэргэ үөрэ-көтө, сэргэхтик бырааһынньыктаата. Куорат тыйаатырдарыгар күн аайы араас кэнсиэртэр, куонкурустар о.д.а. култуурунай дьаһаллар хото ыытылыннылар. Оҕолуун-улахан дьоннуун бырааһынньык көрүн-нарын биллилэр.
Ол эрээри… Арыгыта суох син биир сатамматыбыт. Арыгылаах утаҕы сиэри таһынан иһии, куһаҕан дьаллыктарга умса-төннө түһүү туох да үчүгэйи аҕалбат. Куһаҕан куһаҕан курдук, содула да улахан. Холобур, былырыын, 2017 сылы көрсөр уһун өрөбүллэргэ 9 хонук иһигэр 53 киһи тоҥон өлбүтэ. Дьулаан сыыппара! Кинилэртэн үгүстэрэ арыгылаан баран суорума суолламмыттара быһаарыллыбыта.
Быйыл Алдан оройуонугар Аллараа Кураанах с. 35 саастаах дьахтар дьиэтиттэн чугас сиргэ тоҥон өллө. Муҥнаах хайдах өлбүтэ билиҥҥитэ биллибэт. Суут-медицинскэй экспертиза быһаарыа турдаҕа.
Мэлдьи буоларын курдук дииргэ тиийэбит – киин куораппытыгар араас быһылааннар таҕыстылар. Ол барыта арыгыттан, арыгыны бобуута-хаайыыта суох атыылааһынтан тахсара сэрэйиллэр.
Маннык уһун өрөбүллэргэ, бырааһынньыктарга арыгы атыылааччылар биир да күн өрөбүлэ суох үлэлииллэр. Барыс хантан киирэрин билбэттэрэ кэлиэ дуо? Обургу оҕо эбэтэр номнуо итирбит киһи да киирэн кэллэҕинэ атыылыырга бэлэмнэр. Бу түгэҥҥэ суобас диэн умнуллар. Холобур, Дьокуускайга арыгы атыылыыр Бестужев-Марлинскай аатынан уулуссаҕа турар маҕаһыын үлэһиттэрэ сарсыарда арыгы атыылыы туралларын полициялар туттулар. Полициялар миэстэтигэр 100 лиитирэттэн тахса арыгылаах бородууксуйаны былдьаатылар. Арассыыйа сокуонунан, атыыһыттар 18 саастарын туола илик ыччаттарга уонна итирик дьоҥҥо арыгыны атыылыа суохтаахтар. Бу сокуону утарсааччылар эмиэ бааллар. «Атыыһыт киирбит киһи итиригин-итиригэ суоҕун хайдах быһаарыай?» – дииллэр. Сокуону билэр атыыһыттар дьон баарыгар атыылаабатаҕа буолан баран, дьон аҕыйаатаҕына эбэтэр ким да суох кэмигэр түбэһиннэрэн, итирик киһиэхэ, обургу оҕолорго атыылыыр түгэннэрэ эмиэ тахсар. Омук сирдэригэр, холобур Финляндияҕа итирик киирбит киһиэхэ арыгыны хаһан да атыылаабаттар, сокуонунан бобуллар.
Тохсунньу 3-4 күнэ үүнэр түүнүгэр түүҥҥү кулууптарга обургу оҕолор төһө сылдьалларын бэрэбиэркэлээтилэр. ПДН иниспиэктэрдэрэ уонна участковай боломуочунайдар эрэстэрээннэргэ уонна «Крыша», «Восточная лилия», «Легенда», «Ремикс» кулууптарга, көмпүүтэргэ оонньуур кулууптарга сырыттылар. Дьолго, бу саататар-аралдьытар дьиэлэргэ обургу саастаах оҕолор суох буолан биэрдилэр. Манна даҕатан эттэххэ, обургу саастаах оҕолор уопсастыбаннай миэстэлэргэ 22.00 чаас кэннэ сылдьыа суохтаахтар.
ЫСПЫРААПКА:
Бырааһынньык өрөбүллэригэр Өрөспүүбүлүкэтээҕи 2 №-дээх балыыһаҕа-Суһал медицинскэй көмө киинигэр:
– 1666 киһи медицинскэй көмөҕө наадыйда. Кинилэртэн 255-һэ араас ыарыылаах уонна эчэйиилээх. – 241 итирик туруктаахтан – 15 киһитэ балыыһаҕа киирдэ. – Ожоговай балыыһа быраастарын көмөтүгэр 16 киһи наадыйда. Кинилэртэн 10 киһитэ балыыһаҕа киирдэ.
Надежда Егорова, «Саха сирэ» хаһыат, edersaas.ru