Бүгүн, ахсынньы 29 күнүгэр, Ил Дархан Айсен Николаев улуус уонна куорат уокуруктарын баһылыктарын кытары куйаар ситиминэн мунньахтаата.
Сүбэ мунньахха өрөспүүбүлүкэҕэ эпидемиологическай быһыы-майгы уонна Саҥа дьыллааҕы бырааһынньыгы этэҥҥэ көрсөргө бэлэмнэнии туһунан көрүлүннэ. Эрэгийиэн баһылыга бүгүҥҥү күҥҥэ өрөспүүбүлүкэ үрдүнэн бүтэһик хонукка коронавирус дьаҥар 179 киһи хаптарбытын, ол иһигэр, Дьокуускайга ыалдьааччы ахсаана 70 буоларын эттэ. Хоруона хамсыга 25 оройуоҥҥа бэлиэтэммит. Ахсынньы 26 күнүгэр, дьаҥ 0,82%-тан 0,78%-ҥа диэри намтаабыта бэлиэтэнэр. Куойка 56% толору. Ыараханнык ыалдьыбыттар ахсааннара намыраан эрэр. Бүгүҥҥү күн туругунан 75 киһиттэн, 14 киһи ИВЛ аппараатыгар холбонон сытар. «Быһыы-майгы бигэтийэн эрэр», — диэтэ Айсен Николаев. Ол гынан баран, хоруона хамсыгынан Мэҥэ Хаҥаласка, Нерюнгрига, Мииринэйгэ, Бүлүү улуустарыгар ыалдьааччы элбээн эрэрэ бэлиэтэнэр.
Эпидемиологическай турук уонна ылыллар миэрэлэр тустарынан Бүлүү улууһун баһылыга Сергей Винокуров иһитиннэрдэ. Кини бэлиэтииринэн, ахсынньы 25-28 күннэригэр хоруона хамсыгынан ыалдьыы соһуччу элбээбит. Лаборатория 62 киһи бу дьаҥҥа хаптарбытын бигэргэппит. Ол иһигэр, Сосновкаҕа – 46, Чинэкэҕэ – 1, Сыдыбылга – 13, Кыргыдайга – 1, Бүлүү куоратыгар – 1. Улуус үрдүнэн Бүлүүгэ ньиэрбэ ыарыһахтары эмтиир интэринээт-дьиэтигэр уонна Чочу пришкольнай интэринээтигэр ыалдьааччылар ахсааннара соһуччу тахсыбыт. Винокуров Роспотребнадзор Саха сиринээҕи управлениетынан, улууска бүгүн санитарнай-эпидемиологическай чинчийии ыытыллар диэтэ. Ил Дархан суһал ыстаап миэрэлэри ылыахтааҕын ыйда. Улууска хоруона хамсыгын тарҕаппат туһуттан бары култуурунай уонна маассабай тэрээһиннэри тохтоторго соруйда. Ону таһынан, дьаҥ өрө көбүүтүнэн ыытыллар санитарнай-эпидемиологическай чинчийии түмүктэрин тута биллэрэллэригэр сорудахтаата. Сүбэ мунньахха Кэбээйи улууһун баһылыга Иван Левин, Мииринэй оройуонун баһылыгын э.т. Дмитрий Ситнянскай иһитиннэриилэри оҥордулар.
Өрөспүүбүлүкэҕэ коронавирус дьаҥын бохсуу туһунан уопсай иһитиннэриини СӨ Бырабыыталыстыбатын бэрэссэдээтэлин солбуйааччы Ольга Балабкина оҥордо. Саҥа дьыл бырааһынньыгын күннэригэр хоруона хамсыгын тарҕаппат, бохсор туһугар ылыллар миэрэлэр тустарынан СӨ Роспотребнадзор управлениетын салайааччытын эбээһинэһин быстах кэмҥэ толорооччу Изабелла Самойлова иһитиннэрдэ.
Түмүккэ Айсен Николаев мунньах кыттыылаахтарыгар коронавирус дьаҥын тарҕаппат, бохсор инниттэн атыы-эргиэн кииннэригэр, маҕаһыыннарга, ырыынактарга элбэх киһи мустуутун таһаарбаттарыгар соруйда. Санитарнай сэрэхтээх буолуу ирдэбилин, дезинфекциялааһыны ыытыыны, мааскалаах сылдыыны, бэйэ икки ардыгар тэйиччи буолууну тутуһууну хонтуруоллааһыны күүһүрдэргэ, быраабы харыстыыр уорганнары кытары бииргэ үлэни ыытарга эттэ. Дьон-сэргэ мустуутун таһаарбат туһуттан, атыы тэрилтэлэрин үлэлэрин бириэмэтин бу күннэргэ уһатан биэрэллэригэр сүбэлээтэ. Эрэгийиэн баһылыга организациялар, тэрилтэлэр салалталарыгар тустаах эппиэтинэһи сүгэллэригэр соруйда. Бырааһынньыгы элбэх киһилээх бөлөҕүнэн буолбакка, дьиэ кэргэнинэн эрэ көрсөллөрүгэр өйдөтүү, быһаарыы үлэтин ыытарга эттэ. Дьон куруук баар социальнай тэрилтэлэригэр СӨ Үлэ уонна социальнай сайдыы министиэристибэтин кытта бииргэ эпидемиологическай эрэсиими тутуһууга хонтуруолу күүһүрдэргэ соруйда.
Ковиды утары охсуһар суһал ыстааптарга мэдиссиинэ көмөтүгэр наадыйааччыларга табыгастаах буоларын туһуттан, бырааһынньык күннэригэр дьуһуурустубаны төгүрүк суукка олохтуулларыгар эттэ.
Олохтоох бэйэни салайыныы органнарыгар уотунан, сылааһынан хааччыйар эбийиэктэргэ саахал тахсыбатын туһугар эргиччи болҕомтону күүһүрдэргэ, коммунальнай хаһаайыстыба уонна кэтээн көрөр органнары кытта коммунальнай тиһиктэр тохтоло суох үлэлииллэригэр болҕомтону улаатыннарарга эттэ. Муниципалитеттар баһылыктара бу ыйыыларга сөп түбэһиннэрэн бырааһынньыктааҕы тэрээһиннэргэ уотунан-күөһүнэн, сылааһынан хааччыйар эбийиэктэргэ эппиэтинэстээх сирэйдэри быһаарарга, саахалы туоратар, чөлүгэр түһэрэр үлэни ыытар биригээдэлэри бэлэмнииргэ, иһитиннэрэр-биллэрэр чопчу схеманы тэрийэргэ этилиннэ.
Түмүккэ Айсен Николаев олунньуга коронавирустан быһыыны туруоруу саҕаланарын иһитиннэрдэ. Суһал ыстааптар, улуус киин балыыһалара эрдэттэн бэлэмнээх буолалларыгар эттэ.
СӨ Ил Дархан уонна Бырабыыталыстыба пресс-сулууспата
Андрей Сорокин хаартыскаҕа түһэриитэ
+1
+1
+1
+1
+1
+1
+1