Бүлүүгэ киин куораттартан баахтаҕа кэлэр дьону хонтуруолга ыллылар

Бу күннэргэ Бүлүү улууһунааҕы суһал ыстаап оройуоҥҥа баахтанан кэлэр үлэһиттэри хонтуруолга ылыы уонна сыстыганнаах дьаҥы бохсор  үлэни  бу салаа үлэһиттэрин ортолоругар күүһүрдэргэ быһаарда.

Бу туһунан улуустааҕы пресс-сулууспа иһитиннэрэр.  Улууска тутууну ыытарга үптэрэ быһаарыллыбыт тутууларга уонна Бүлүү улууһунан ааһар федеральнай суол биэс учаастагар атын сирдэртэн  анал исписэлиистэр кэллилэр. Сорох учаастактарга сезоннааҕы үлэ  саҕаланна.

Хампа уонна Дьөккөн икки ардыгар баар учаастак салайааччыта  Санкт-Петербург уонна Красноярскай куораттартан эбии  суол инженердэрин аҕаларын туһунан сэрэттэ. Онон суһал ыстаап суол үлэлэригэр  үлэлии кэлбит дьону барыларын хонтуруолга ылан, миэстэтигэр обсерваторы бэлэмнииллэрин ирдээтэ. Маны таһынан, ыстаап улууска  Өкүндү кадетскай оскуолатыгар уонна Хампа орто оскуолатын интэринээттэригэр быстах кэмҥэ изолятардары тэрийэри былааннаата.

Ыстаап мунньаҕар улуустааҕы прокуратураттан прокурор э.т.  А.Н. Масин улуус олохтоохторо дьиэҕэ олоруу эрэсиимин ситэ тутуспаттарын, таксилар дьону күн бүгүҥҥэ диэри тиэйэ-таһа туралларын бигэргэтэр биллэриилэр батсаап ситимигэр тахса туралларынан, пассажирдары тиэйэр биллэриини таһаарар дьон нүөмэрдэрин, дьиэҕэ олоруу эрэсиимин тутуспат буолуу түгэннэрин быһыытынан сыаналаан, прокуратураҕа суругунан киллэрэри туруоруста.

Елена ПОТОЦКАЯ, «Саха сирэ» хаһыат, edersaas.ru

Хаартыска — «Бүлүү улууһа» МТ пресс-сулууспата.