Социальнай ситимнэргэ Бүлүү куорат ууга устан эрэрин туһунан видео-устуулар дьону аймаатылар. Улуус киинигэр үөскээбит улахан чалбаҕы, бэл, тыынан эрдэн туораабыттар.
Бу балаһыанньа туһунан ыйыталаһаары, Бүлүү куоратын дьаһалтатын баһылыга Ньургустаан Афанасьевы кытта сибээскэ таҕыстыбыт:
— Бүлүү куоратын суолун көрүүтүгэр 2018 сылтан 3 мөлүйүөн 100 тыһыынча солкуобай көрүллүбүтэ. 2019-2020 сылларга бу сууматтан 2 мөлүйүөн 100 тыһыынча куорат иһинээҕи көрүүгэ-истиигэ ороскуоттанна. Манна суолу тэҥнээһин, хаарын ыраастааһын, гравийдааһын киирэр.
Быйыл хаһааҥҥытааҕар даҕаны элбэх хаар түстэ, 750 кууб хаары тиэйтэрдибит. Маны сэргэ дьаамалары, чалбахтары кумахтаах гравий симиэһинэн куппуппут. Бүлүү куораттан хаары таһыыга “Коммунсервис”, “Сыа Бүлүү” ТХПК, «Сахаспецтранс», «Вилюит» тэрилтэлэр күүстээхтик үлэлэстилэр. Быйыл носуоһунан, пуомпанан ууну бырахтарыыны «Вилюйавтодор» тэрилтэнэн оҥоттордубут. Манна диэн эттэххэ, куораппыт бары улахан тэрилтэлэрэ көхтөөхтүк үлэлэһэ олороллоро үөрдэр.
Кыра уолбут ууга урукку күөл оннулара, куорат уута мустан киирэн, чахчы, Каландрашвили, Партизан Семенов, Марк Жирков уулуссаларыгар уу үөскээн, олохтоохтор барар-кэлэр усулуобуйаларыгар уустуктары үөскэтэ сырытта. Ол эрээри, биир да дьиэ ууга барбата.
Муус устар 23 күнүгэр пуомпаларынан ууну оботторон ыыппыппыт. Ыыппыт ууларбыт Бүлүү өрүс боротуохатынан түһэн барар. Уу сыл аайы тоҥмокко барарыгар уу пуомпатын туруорар былааннаахпыт.
Ульяна ЗАХАРОВА, edersaas.ru