Өрөспүүбүлүкэтээҕи «Эйгэ» уопсастыбаннай тэрилтэ бырабылыанньатын чилиэнэ Ирина Егоровна Петрова Бүлүү куоракка, П.Х.Староватов аатынан кыраайы үөрэтэр мусуой быыстапкалыыр саалатын иһинэн тэриллибит коллекционердар түмсүүлэрин салайар.
Араас элбэх идиэйэлэрдээх, сонунтан сонун тэрээһиннэри ыытарын таһынан, кинини үгүстүк көрсүһүүлэргэ ыҥыраллар.
Ирина Егоровна уопсастыбаннай үлэтин сүрүн хайысхатынан оҕолору кытта үлэ буолар. Кини биэнсийэҕэ тахсан баран, ыччат ортотугар иитии-үөрэтии үлэтин тиһигин быспакка ыытар. Оҕо тэрилтэлэрин кытта сибээс олохтуур. Бу дьыалатын олус сөбүлүүр.
Ол курдук, аҕыйах хонуктааҕыта “Кэнчээри”’ приют иитээччитэ Мария Васильевна Яковлева ыҥырыытынан, Кыайыы бырааһынньыгар анаан оҕолорго “Дьоруой-пионердар” диэн тиэмэлээх кэлэн, презентация оҥорон, сэрии сылларын хорсун пионердарын туһунан сиһилии кэпсээтэ.
Оҕолор олус интэриэһиргээтилэр. Маны таһынан Ирина Егоровна оҕолор саастарыгар сөптөөх дьоҕус викторинаны ыытан, билиилэрин көрдө-иһиттэ уонна бэйэтин сэмэй, минньигэс бириистэрин туттарда.
Бу көрсүһүү приют иһинэн ыытыллар “Оҕоҕо — үтүө сүрэхтэн” диэн бырайыак чэрчитинэн ааста.
Валентина ВАСИЛЬЕВА.