Быйыл биир кэлим эксээмэни 5993 киһи туттарар диэн бүгүҥҥү пресс-кэмпириэнсийэ кэмигэр СӨ үөрэҕин уонна наукатын миниистирэ Михаил Сивцев иһитиннэрдэ.
Миниистир оскуоланы 7968 оҕо бүтэрэриттэн, 5993 киһи биир кэлим эксээмэн туттарар баҕалааҕын биллэрбитин эттэ. Итинтэн 574 киһи оскуоланы урукку сыллларга бүтэрбит. “Ити ааспыт сылы кытта тэҥнээн көрдөххө, 25 бырыһыан кэриҥэ аҕыйах. Бу аата 2000 кэриҥэ киһи орто анал үөрэххэ туттарсар эбэтэр үлэлиир былааннааҕын көрдөрөр”, — диэн бэлиэтээтэ.
Урукку сыллартан уратыта диэн, эксээмэн ыытыллар пууннарыгар сүрүн ирдэбили таһынан, Роспотребнадзор ирдэбилэ тутуһуллуохтаах. “Маныаха пууннарга киирэргэ эксээмэн туттарарааччылар бэйэ-бэйэлэриттэн тэйиччи туралларын туһугар бэлиэлэри оҥортообуттар, киирэр ааҥҥа температураларын бэрэбиэркэлииллэр, иһирдьэ киирээттэрин кытта илиилэрин дезинфекциялыыр сириэстибэнэн ыстараллар, хас биирдии үөрэнээччи инструкцияны истэр, аудиторияҕа кырата балтараалыы миэтэрэ тэйиччи олороллор. Бэҕэһээ оҕото суох боруобалыыр эксээмэни ыытан көрдүбүт. Күн бүгүн Саха сирэ эксээмэн ыытарга бэлэм”, — диэн Михаил Сивцев быһаарда.
СӨ үөрэх хаачыстыбатын кэтээн көрөр киин дириэктэрэ Надежда Попова Саха сиригэр эксээмэни ыытыыга чопчу мэхэниисим оҥоһуллубутун ыйар. Ол курдук, эксээмэн ыытыллар пууннара тохтобула суох үлэлииллэрин таһынан, хааччыйыы үлэтин күүһүрдүбүттэр. “Уопсайа, 5847 киһи, ону таһынан 1073 эрэгийиэннээҕи, 137 федеральнай таһымнаах кэтээн көрөөччү үлэлиэҕэ. Өрөспүүбүлүкэҕэ баар икки ситуационнай кииҥҥэ 84 онлайнынан кэтээн көрөөччү олоруоҕа. Итиэннэ 250 медик сыһыарыллыаҕа. 1 эрэгийиэннээҕи, 2 федеральнай таһымнаах тэрээһини уонна боруобалыыр эксээмэни ыыттыбыт. Пууннар бары ирдэбилгэ эппиэттииллэр”, — диэн эттэ.
Эксээмэн ыытыллар пууннарыгар киириэх иннинэ температураны бэрэбиэркэлииллэр. Өскөтүн оҕо температурата нуорматтан үрдүк буоллаҕына анал хоско илдьэн олордоллор. Температурата түспэтэх буоллаҕына төрөппүтү ыҥыраллар.
Аны урукку сылларга апелляцияны кэтэхтэн ыытар буоллахтарына, быйыл дистанционнай ньыманан барыаҕа диэн иһитиннэрдилэр.
Людмила ПОПОВА, “Саха сирэ” хаһыат, edersaas.ru