Бу күннэргэ “Инникигэ хардыы” XXI научнай-практическай кэмпириэнсийэ буолла. Кэмпириэнсийэ өрөспүүбүлүкэтээҕи түһүмэҕэр Саха сирин араас муннуктарыттан барыта 1000-тан тахса оҕо научнай бырайыагын көмүскээтэ. Кинилэр үлэлэрин 300 эдэр учуонай уонна ХИФУ профессора сыаналаата.
Людмила Попова, “Саха сирэ”, https://edersaas.ru/
ХИФУ пресс-сулууспата иһитиннэрбитинэн, түмүк юниордарга уонна үрдүкү кылаас оҕолоругар диэн арахсан, барыта 29 секциянан тахсар. Быйыл экспердэр барыта 900-тэн тахса дакылааты иһиттилэр. Кэмпириэнсийэ чэрчитинэн математикаҕа, физикаҕа, информатикаҕа, инженернэй дьыалаҕа олимпиадалар ыытылыннылар.
Научнай-практическай кэмпириэнсийэ финалистара Саха сирин академиктарын анал бириэмийэлэрин лауреаттарынан буоллулар. Ол курдук, ХИФУ ректора Евгения Михайлова бириэмийэтин Мэҥэ Хаҥалас улууһуттан сылдьар 9-с кылаас үөрэнээччитэ Эрчим Яковлев ылла. Кини педагогическай наука секциятыгар биир бастыҥ дакылааты аахта.
Оттон биология биридимиэтин интэриэһиргиир Үөһээ Бүлүү улууһун Боотулуу орто оскуолатын үөрэнээччитэ Дьулус Федотов университет профессора Никита Соломонов бириэмийэтин лауреатынан ааттанна.
Россия академига Афанасий Мунхалов наҕараадатын Чурапчы улууһун Кытаанах орто оскуолатын үөрэнээччитэ Алина Винокурова ылар дьолу биллэ. Алина үлэтин “Мода уонна дизайн” секциятын экспердэрэ үрдүктүк сыаналаатылар.
ХИФУ инженернэй-техническэй институтун профессора Алексей Местников: “Быйыл техническэй наука секциятыгар бастыҥнарынан Аллараа Бэстээх 2-с №”-дээх оскуолатын чинчийээччилэрэ ааттаннылар. Урукку сылларга кыайыылаахтарынан биир оскуола оҕолоро тахсыбыттарын өйдөөбөппүн. Бу педагогтар, оскуола салалтатын сыралаах үлэлэрин, улахан болҕомто ууралларын туоһута буолар. Сыллата биһиги сайыҥҥы оскуолабытыгар кэлэн үөрэнэллэр”, — диэн санаатын үллэһиннэ. Кыайыылаахтарынан Ашот Шагинян, Вера Колмакова (Аллараа Бэстээх), Богдан Васильев (Сунтаар, Тойбохой) буоллулар.
Оттон математика наукаларын секциятын эксперэ, ХИФУ математикаҕа научнай-чинчийэр институтун научнай үлэһитэ Валерий Федоров, дьон сэҥээриитин тардар үлэлэр бааллар, олортон 9 бастыҥ бырайыагы талан, үөрэнээччилэр Россиятааҕы кэмпириэнсийэлэригэр кытталларыгар мэктиэлээтибит диэн эттэ. Ону тэҥэ, былырыыҥҥы лауреаттартан Галина Владимирова (Дьокуускай) Россия хамаандатыгар киирбитин, оттон Өктөмнөөҕү лицей үөрэнээччитэ Павел Васильев Бүтүн Россиятааҕы кэмпириэнсийэ кыайыылааҕынан буолбутун иһитиннэрдэ.
Маны таһынан, улуустарынан эмиэ түмүгү таһаардылар. Ол курдук, хотугу бөлөххө саамай элбэх лауреаты бэлэмнээбит улууһунан Аллайыаха ааттанна. Түөрт кыттааччыттан үһэ секцияларыгар бастаабыттар. Кинилэри сэргэ бэйэлэрин бөлөхтөрүгэр Ленскэй уонна Чурапчы улуустара кыайыылаахтарынан таҕыстылар.
Людмила Попова, «Саха сирэ» хаһыат, edersaas.ru .