Сүрүн Үөрэх уонна наука

Быйылгы эксээмэҥҥэ туох уларыйыылар киирдилэр?

Оскуоланы бүтэрээччилэр, төрөппүттэр үгүстүк туоһулаһар түөрт сүрүн ыйытыыларыгар СӨ Үөрэҕин уонна наукатын министиэристибэтин уопсай үөрэхтээһиҥҥэ салайааччытын солбуйааччы Туйаара Абрамова хоруйдуур.

edersaas.ru

Ыйытыы: Аттестат ылар туһугар оскуоланы бүтэрээччи ханнык эксээмэннэри, хас баалга туттарара ирдэнэрий?

Хоруй: Быйыл аттестат ыларга икки суол баар:  судаарыстыбаннай түмүктүүр эксээмэн (государственный выпускной экзамен) эбэтэр биир кэлим эксээмэн (единый государственный экзамен).

Биир кэлим эксээмэни (ЕГЭ) үрдүк үөрэххэ туттарсар былааннаах оҕолор туттараллар. Кинилэр аттестаты ылар туһугар булгуччу нуучча тылыгар эксээмэни ирдэнэр алын баалга (минимальный балл) туттарыахтаахтар. Ол түмүгүнэн аттестат бэриллэр. Математикаҕа эксээмэн ирдэммэт.

Сүрүн түмүктүүр эксээмэни (ГВЭ) үрдүк үөрэххэ туттарсыбат оҕолор талбыттара. Бу эксээмэн БКЭтэн судургу. Кинилэр аттестат ылар туһугар булгуччу нуучча тылыгар уонна математикаҕа эксээмэни туттараллар.

 

Ыйытыы: Кыһыл аттестакка уонна мэтээлгэ суоттанааччылартан туох ирдэнэрий?

Хоруй: Былырыын биир кэлим эксээмэн баала пандемиянан сибээстээн учуоттамматах эбит буоллаҕына, мэтээлгэ киирсээччилэр быйыл бары биридимиэттэригэр биэс сыаналаах уонна нуучча тылыгар биир кэлим эксээмэҥҥэ (БКЭ) 70-тан үрдүк баалы ылаллара ирдэнэр, атын талан ылбыт биридимиэттэрин эксээмэннэрин алын баалтан намыһах баалга туттарыа суохтаахтар.

Онтон судаарыстыбаннай түмүктүүр эксээмэни (ГВЭ) талбыт түгэннэригэр математикатын уонна нуучча тылын иккиэннэрин “5” сыанаҕа туттарыахтаахтар.

 

Ыйытыы: Өскөтүн эксээмэнигэр алын баалы кыайан ылбатаҕына (бырабаал) хайыырый?

Хоруй: Өскөтүн БКЭҕэ нуучча тылыгар ирдэниллэр алын баалы кыайан ылбатаҕына, эрэсиэрбэ  күнүгэр (резервный день) туттарар. Иккиһин бырабааллаатаҕына күһүн балаҕан ыйыгар туттарар. Нуучча тылын сүнньүнэн үчүгэйдик туттараллар. Биир эмит оҕо кыайан туттарбатах түгэнэ баар буолааччы.

 

Ыйытыы: Биридимиэти уларытар көҥүллэнэр дуо?

Хоруй: Эксээмэн саҕаланыа икки нэдиэлэ иннинэ эксээмэн көрүҥүн (форматын) уларытыахтарын сөп.

 

Людмила ПОПОВА, “Саха сирэ” хаһыат, edersaas.ru

2
0