Бэлиитикэ Суолталаах

Быйылгы быыбарга 5332 хандьыдаат регистрацияламмыт

Балаҕан ыйын 11 күнүгэр  ыытыллар муниципальнай  таһымнаах быыбардарга хандьыдааттары регистрациялааһын атырдьах ыйын 10 күнүгэр түмүктэммитэ.

Быыбар хамыыһыйаларын түмүктүүр дааннайдарынан, Саха сирин үрдүнэн барыта 5435 хандьыдаат туруоруммутуттан 5332-тэ регистрацияны ааспыт. Тоҕус баартыйа  (ЕР, СРЗП, КПРФ, ЛДПР, Биэнсийэлээхтэр баартыйалара, ГП, Родина, Социальнай көмүскэл баартыйата, Дьыала баартыйата) туруорбут 3298 хандьыдаата, итиэннэ бэйэтэ туруоруммут 2034 хандьыдаат бааллар.  103 хандьыдаат докумуоннара ситэтэ суох буоланнар, регистрацияны ааспатахтар.  Тоҕус муниципальнай тэриллии (улуус) дьаһалтатын баһылыгын быыбарыгар 45 хандьыдаат туруоруллубутуттан, 39 киһи регистрацияламмыт. Кинилэртэн 22 хандьытаат баартыйалартан турбуттар, 17 хандьыдаат бэйэтин туруоруммут. 190 нэһилиэк дьаһалтатын баһылыгын быыбарыгар 523 киһи регистрацияны ааспыт. Улуус таһымнаах бэрэстэбиитэллээх уорган быыбарыгар (110 мандаат) 300 хандьыдаат туруоруллубут, 297 хандьыдаат регистрацияны ааспыт. Нэһилиэк таһымнаах бэрэстэбиитэллээх уорган быыбарыгар (2771 мандаат) 4530 хандьыдаат туруоруллубутуттан 4473 хандьыдаат регистрацияламмыт. Хандьыдааттар тустарыгар аналлаах аҕытаассыйа атырдьах ыйын 13 күнүттэн саҕаламмыта уонна сокуон модьуйуутунан быыбар буолуо биир күн иннинэ (балаҕан ыйын 10 күнүгэр) “чуумпуруу күнэ” биллэриллэр.

 

 

0
0
Telegram @edersaas20