Бүгүн өрөспүүбүлүкэ үрдүнэн 8 улууска, Дьокуускай куоракка, 215 нэһилиэккэ баһылыктар, алта улууска, 281 нэһилиэккэ дьокутааттар талыллыахтара. Быйылгы быыбар туох уратылаах буолуоҕай?
Аграфена КУЗЬМИНА, «Саха сирэ» хаһыат, edersaas.ru.
QR-код. Быйылгыттан саҕалаан быыбардыыр хамыыһыйаларга QR-код диэн баар буолла. Ол эбэтэр хамыыһыйалар хас биирдии боротокуолу анал кодунан бэрсэн, үлэ хаамыытын өссө тэтимирдэн биэриэхтэрэ. Бу кодунан дааннай барыта электроннай барыйааҥҥа көһүөҕэ.
Цифровой сибээс. Ону сэргэ хамыыһыйалар бары цифровой сибээс каналыгар киирдилэр. Урукку өттүгэр төлөпүөнүнэн эрэ сибээстэһэ олорор буоллахтарына, билигин цифровой сибээһинэн туһаныахтара. Ити информацияны, докумуону тириэрдиигэ дэбигис буолуоҕа.
Декларация. Электроннай барыйааҥҥа көһүүнү сэргэ нэһилиэк дьокутааттара аны мантан ыла бары дохуоттарын көрдөрөр декларация туттарар буоллулар. Билигин быыбарга кытта сылдьар хандьытааттар бары дохуоттарын туһунан ыспыраапка аҕалан олороллор.
“Барыларын утарабын”. Биир улахан уларыйыынан ааспыт муниципальнай быыбарга “барыларын утарабын” диэн графа киирбитэ буолар. Ол эрээри бу графаны туһанан сорохтор быыбары ыһан кэбиһэллэр диэн быйыл ыам ыйыгар Ил Түмэҥҥэ көрүллэн көтүрүллүбүтэ да, Россия быыбарын киин хамыыһыйата бэрэбиэркэлээн баран, федеральнай сокуоҥҥа сөп түбэспэт эбит диэн быһаарбыта. Ол иһин быйылгы быыбарга бу графа төттөрү киирдэ.
Аграфена КУЗЬМИНА, «Саха сирэ» хаһыат, edersaas.ru.