Коронавирус дьаҥынан сибээстээн былырыын, быйыл эксээмэннэри судургутуппуттара. Быйыл ону төттөрү төнүннэрэр санаалаахтар. Ити туһунан Үөрэҕи уонна науканы кэтээн көрөр федеральнай сулууспа салайааччыта төрөппүттэргэ аналлаах мунньах кэмигэр иһитиннэрдэ.
Санатан эттэххэ, 9-с уонна 11-с кылаас үөрэнээччилэригэр ыытыллар булгуччулаах эксээмэннэри былырыын, быйыл дьаҥынан сибээстээн судургутуппуттара.
Биллэн турар, хас биирдии улахан кылааска үөрэнэр оҕолоох төрөппүтү эксээмэн боппуруоһа долгутар. Онон мунньах кэмигэр төрөппүттэр сүрүннээн эксээмэн боппуруоһун көтөхпүттэрэ өйдөнөр. Мунньахха быһаарбыттарынан, 9-с кылаастар 2022 сылга эрдэтээҥҥи курдук нуучча тылын, математиканы сэргэ икки биридимиэккэ талан эксээмэни туттарыахтарын сөп. Онтон 11-с кылааһы бүтэрээччилэр аттестат ылар туһугар икки булгуччулаах биридимиэти (нуучча тылын уонна математиканы) туттараллара ирдэниэҕэ диэн быһаараллар. Судаарыстыбаннай түмүктүүр эксээмэни (ГВЭ) доруобуйаларынан хааччахтаах уонна бэрээдэгинэн көрүллэр атын категориялар эрэ туттарыахтара, онтон атыттар бары — үрдүк үөрэххэ киирэллэриттэн-киирбэттэриттэн тутулуга суох биир кэлим эксээмэни (ЕГЭ) диэтилэр. Федеральнай сулууспа салайааччыта үөрэнээччилэр хас эксээмэни туттараллара ахсынньы 1 күнүгэр диэри барыта быһаарыллыаҕа диэн эттэ эрээри, аны саас коронавирус дьаҥа хайдах буолара биллибэт.
Людмила ПОПОВА, “Саха сирэ” хаһыат, edersaas.ru
Хаартыска: relasko.ru