СӨ үөрэҕин уонна наукатын миниистирин бастакы солбуйааччы Михаил Присяжнай социальнай ситимнэринэн быһа сибээскэ тахсан, көрөөччүлэр ыйытыыларыгар хоруйдаата. Тэрээһин кэмигэр өрөспүүбүлүкэ орто анал үөрэҕин кыһаларыгар 10 саҥа идэ аһыллыаҕа диэн иһитиннэрдэ. Ханныктарый?
“Быйылгы сылга уон саҥа идэ аһыллыаҕа, сүрүннээн бөдөҥ хампаанньалар сакаастарынан сир анныттан хостонор баайы кытта сибээстээхтэр. Устудьуоннары соҕурууҥҥу Саха сирин технологическай кэллиэскэ, Алданнааҕы политиэхиньическэй тиэхиньикумҥа, Хандыгатааҕы хайа-геологическай тиэхиньикумугар бэлэмниир былааннаахпыт. Ону тэҥэ, саҥа идэлэргэ бэлэмнээһиҥҥэ сыҕарыйыы Мирнэйдээҕи региональнай-тиэхиньическэй кэллиэскэ баар”, — диэн эттэ.
Уопсайынан, орто анал үөрэх сайдыытыгар билигин саамай табыгастаах түһүмэх диэн кини бэлиэтиир. Ол курдук, аныгы тэрилинэн хааччыллыбыт мастарыскыайдары аһалларын, экспиэртэри, маастардары үөрэтэллэрин эттэ. Быйыл Миринэй, Үөһээ Бүлүү, Жатай, Соҕурууҥҥу Саха сирин технологическай тиэхиньикумугар, ХИФУ кэллиэһигэр, уопсайа, 28 саҥа мастарыскыайы тэрийэр былааннаахтар. Бу мастарыскыайдарга тирэҕирэн, саҥа үөрэх бырагыраамалара аһыллаллар диэн миниистири солбуйааччы иһитиннэрдэ. Ньиэп, гаас идэлэрин таһынан, өҥө оҥоруутугар сыһыаннаах идэлэр буолуохтара диэн эттэ.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).