Маны аах Нацбырайыактар

Быйыл Тааттаҕа саҥа оскуола үлэҕэ киириэҕэ

Үөрэхтээһин национальнай бырайыагынан Таатта улууһун Тыараһа нэһилиэгэр икки этээстээх саҥа оскуола тутуллан бүтэн, быйылгы үөрэх дьылыгар үлэҕэ киириэхтээх. Бу туһунан оскуола дириэктэрэ Петр Полускин кэпсиир.

М.Н. Турнин аатынан Тыараһа орто оскуолатыгар билигин 96 оҕо үөрэнэр. Быйылгы үөрэх дьылыгар өссө 15 оҕо бастакы кылааска киирэр. Урукку оскуолалара хаарбах туруктаах буолан сабыллан, кэлиҥҥи биэс сылга үөрэнээччилэр 3-4 сиринэн сүүрэ сылдьан үөрэммиттэрэ. Саҥа оскуола тутуутун нэһилиэнньэ туруорсубута отучча сыл буолла.

– Оскуола бастакы олуга 2019 сыллаахха түһэриллибитэ. Икки этээстээх 90 миэстэлээх оскуола буолар. Тутууну “Мотажник” диэн олохтоох тэрилтэ сүрүннээн ыыта сылдьар. Бырайыагын оскуолабыт выпускнига Дмитрий Мегин оҥорбута. Атын оскуолалардааҕар уратыта диэн спортивнай саалата иккис этээскэ турар. Онон кыһын спортивнай саалабыт сылаас буолуохтаах. Оскуолабыт ис бараанын “Айтал” диэн тэрилтэ дизайнаан оҥоро сылдьар. Салайааччы Туйаара Терехова буолар. Тутуу билигин 80 % бүтэн турар. Оскуола тиэргэнигэр спортивнай былаһаакка тутуллуохтаах, ону таһынан уһаайба иһэ барыта тупсарыллыахтаах. Тутуу, былаан быһыытынан, сэтинньигэ бүтэн олоххо киириэхтээх, – диэн этэр дириэктэр Петр Полускин.

Манна даҕатан эттэххэ, Тыараһа оскуолата агро хайысхалаах. Оскуола сылгы көрүүтүнэн, иитиитинэн, оҕуруот аһын олордуутунан дьарыктанар. Ону таһынан педагогическай наука кандидата Екатерина Чехордуна олоҥхо бырайыагынан оҕолорун үөрэтэр.

Аграфена КУЗЬМИНА.

0
0