Улуустарга уонна нэһилиэктэргэ түргэн интэриниэти киллэрии былаан быһыытынан барар. Холобур, быйыл Саха сиригэр киинтэн ыраах сытар 16 нэһилиэккэ УЦН 2.0 бырагырааманан түргэн интэриниэти (4G) киллэриэхтэрэ.
Бу туһунан иһитиннэрии бу күннэргэ РФ Сыыппараны сайыннарыыга, сибээскэ уонна маассабай коммуникация министиэристибэтин саайтыгар таҕыста. Ол туһунан СӨ инновацияҕа миниистирэ Анатолий Семенов иһитиннэрдэ. «Бу тустаах үлэ «Сыыппара экэниэмикэтэ» диэн национальнай бырагыраама чэрчитинэн, федеральнай бүддьүөттэн үбүлэнэр. Тустаах бырагыраамаҕа кыттары нэһилиэктэр олохтоохторо судаарыстыбаннай өҥө саайтыгар киирэн бэйэлэрэ быһаардылар. Куоластааһыҥҥа кыттыбыт олохтоохтор бэйэлэрин эрэгийиэннэригэр 100-тэн 500-кэ диэри нэһилиэнньэлээх пууннары таллылар. Куоластааһыҥҥа Саха сириттэн 11263 олохтоох кытынна. Бу үлэни «Ростелеком» ПАУо олоххо киллэриэҕэ», — диэн Анатолий Аскалонович быһаарар.
2022 сылга тустаах бырагыраамаҕа хабылыннылар:
1.Кэбээйи улууһа, Сэбээн Күөл;
2.Кэбээйи улууһа, Тыайа;
3. Кэбээйи улууһа, I Лүүчүн;
4. Үөһээ Бүлүү улууһа, Быракаан;
5. Мэҥэ Хаҥалас улууһа, Чыамайыкы;
6. Мииринэй оройуона, Сүлдьүкээр;
7. Өлүөхүмэ улууһа, Дэлгэй;
8. Өлүөхүмэ улууһа, Уолбут;
9. Уус Маайа улууһа, Эдьээн;
10. Таатта улууһа, Хара Алдан;
11. Ленскэй оройуона, Чамча;
12. Муома улууһа, Чуумпу Кытыл;
13. Нам улууһа, Искра;
14. Бүлүү улууһа, II Күүлэт;
15. Алдан оройуона, Чагда;
16. Уус Маайа улууһа, Күп.
edersaas.ru