Быйыл төһө от оттонно?

Бөлөххө киир:

Тыа хаһаайыстыбатын министиэристибэтин Үүнээйини үүннэриигэ, мелиорацияҕа, материальнай-техническэй хааччыйыыга уонна суһал бэлэмнээһиҥҥэ департаменын салайааччы Вячеслав Гаврильев брифиҥҥэ быйылгы оттооһун үлэтин хаамыытын туһунан иһитиннэрдэ.

— Быйыл өрөспүүбүлүкэҕэ 443 тыһыынча туонна оту бэлэмниир былааннаахпыт. Бүгүҥҥү туругунан, 308 тыһыынча туонна от оттонно, ити былаан 70%-на буолар. Былырыыҥҥыны кытары тэҥнээтэххэ, кыраапыктан хаалыы баар. Сүрүннээн Бүлүү, Кэбээйи, Үөһээ Бүлүү, Мэҥэ Хаҥалас улуустарыгар ардах күүскэ түһэн,  былаантан хаалыы баар. Бу улуустар, былырыыҥҥыны кытары тэҥнээтэххэ, иккилии тыһыынча туоннанан хаалан иһэллэр.

Сиилэһи бэлэмнээһиҥҥэ былаан — 30 тыһыынча туонна, итинтэн 13,5 тыһыынча туонна сиилэс бэлэмнэннэ. Сенаһы бэлэмнээһиҥҥэ былаантан хаалан иһэбит, тоҕо диэтэххэ, хаһаайыстыбалар билигин сүрүн күүстэрин окко уураллар.

Быйыл сорох улуустар ыраах сирдэргэ баран оттуур ньыманы эмиэ туһаналлар. Былырыын бу маннык ыраах сирдэргэ оттоон, былааны толорон, кыстыгы этэҥҥэ туораабыттара.

Ангелина Васильева, “Саха сирэ” хаһыат, edersaas.ru

Хаартыска: sakhaparliament.ru.

+1
0
+1
0
+1
0
+1
0
+1
0
+1
0
+1
0