Быйыл социальнай хантараак суумата үрдүөҕэ

Бөлөххө киир:

2022 сылга социальнай хантараак бырагырааматыгар 616 мөлүйүөн солкуобай көрүллүөҕэ. Ааспыт сылга 500 мөлүйүөн солкуобай суумалаах социальнай хантараагынан 5 тыһыынчаттан тахса ыал туһаммыта. Кэнники үс сылга бу бырагырааманы үбүлээһин 2,6 төгүл улаатта диэн үлэ, социальнай сайдыы миниистирин солбуйааччы Альбина Трубина иһитиннэрдэ.

Бырагырааманы үбүлээһин судаарыстыбаннай да, федеральнай да бүддьүөттэн барар. Ааспыт сылга үлэ көрдүүр дьон ортотунан 51,4 тыһыынча солкуобайы, бэйэ дьыалатын тэриниэхтэрин баҕалаахтар – 250 тыһыынча солкуобайы, кэтэх хаһаайыстыбаны сайыннарааччылар – 100 тыһыынча солкуобайы, ыарахан балаһыанньаттан тахсарга – 55 тыһыынча солкуобайы ылбыттара, — диэн кини кэпсээтэ.

Ону тэҥэ, үлэ көрдүүр, бэйэ дьыалатын арынар, кэтэх хаһаайыстыбаларын сайыннарар дьон СӨ Идэҕэ бэлэмниир киинигэр үөрэниэхтэрин сөп. Үөрэнэргэ анаан 30 тыһыынча солкуобай эбии көрүллэр.

Сотору кэминэн социальнай хантараак бырагырааматыгар уларыйыы киириэхтээх: кэтэх хаһаайыстыбаны сайыннарар дьоҥҥо көмө суумата 100 тыһыынча солкуобайтан 200 тыһыынча солкуобайга тиийэ үрдүөхтээх. Бу көмөнү икки бүк үрдэтэр туһунан Ил Дархан Айсен Николаев этэн турар.

Социальнай хантараак бырагыраамата үлэтэ суох, идэ ылыан баҕарар ыарахан балаһыанньаҕа түбэспит дьоҥҥо көмөлөһөр, дьарыктаах буолалларын хааччыйар сыаллаах.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0