Маны аах Тырааныспар

Быйыл сэтинньиттэн Нерюнгри аэропуорда салгын суудуналарын түһэриэҕэ

Атырдьах ыйын 27 күнүгэр Нерюнгри аэропуордун саҥардан оҥоруу хаамыытын Саха сирин баһылыга Айсен Николаев көрдө-иһиттэ. Билигин манна уу сүүрэр сирдэрин, көтөр-түһэр балаһаны бүрүйүү аллараа бүрүөһүнүн уонна бетонтан үөһээҥҥи бүрүөһүнүн, сырдатар-сигналлыыр тэрили таҥыы ыытыллар.

Нерюнгри аэропуордун көтөр-түһэр балаһатын саҥардыы 2024 сылга диэри кэмҥэ Магистральнай инфраструктураны уларытан оҥоруу уонна кэҥэтии кэлимсэ былааныгар олоҕуран ыытыллар.

Аэропуорт комплексын саҥардыы былаанынан искусственнай көтөр-түһэр балаһаны оҥорууну сэргэ салгын суудуналара туруохтаах 12 стоянкатын саҥардаллар, чааска 300 пассажиры аһарар кыахтаах 9 тыһ.кв. м. иэннээх үлэһиттэргэ уонна пассажирдарга аналлаах дьиэни тутуу, быыһыыр ыстаансыйа, 960 кубическай миэтэрэ уматыгы харайар ыскылаат оҥоһуллар.

Саха сирин тырааныспарка уонна суол хаһаайыстыбатыгар миниистирэ Владимир Сивцев иһитиннэрбитинэн, сырдатар-сигналлыыр тэрили таҥыы кэнниттэн тустаах балаһаны лицензиялааһын ыытыллыаҕа, аэрпопуорт бу сыл сэтинньи ыйыттан үлэтин сөргүтэрин туһугар.

Бу эбийиэккэ 60 инженер-тэхиньиичэскэй үлэһит, 234 оробуочай уонна механизатор, 54 тиэхиньикэ үлэлииллэр. Бүгүн эбийиэк туту у өттүнэн бэлэмэ 59,3 бырыһыаҥҥа тэҥнэһэр. Үлэ былаан быһыытынан хаалыыта суох барар.

Өрөспүүбүлүкэ баһылыгар “СтройДорСервис” ХЭТ бэрэстэбииттэллэрэ иһитиннэрбиттэринэн, балаҕан ыйын 10 күнүгэр диэри аэродрому бүрүйүүнү саҥардыы үлэтэ түмүктэниэҕэ. Нерюнгри аэропуорда салгын суудуналарын 2021 сыл сэтинньи 1 күнүттэн олордуоҕа.

2022 сыллаахха аэропуорт көмөлтө инфраструктуратын тутууга үлэ барыаҕа: аэровокзалы, ГСМ ыскылаатын, быһыыр ыстаансыйаны.

Айсен Николаев үлэни көрөн баран, Нерюнгри аэропуорда үлэтин бу сыл сэтинньи ыйын аһарбакка эрэ дьиҥнээх эрэсииминэн үлэлиирэ наадатын эттэ.

Саха Өрөспүүбүлүкэтин Ил Дарханын уонна  Саха Өрөспүүбүлүкэтин Бырабыыталыстыбатын пресс-сулууспата

Андрей Сорокин түһэриитэ, СИА.

Бэлэмнээтэ Женни Стрюкова.

0
0
Telegram @edersaas20