Быйыл Саха сиригэр оскуола өрөмүөнүгэр анаан 2,5 млрд. солк. үбү көрүөхтэрэ
“Оскуола систиэмэтин саҥардыы” бырагыраама иитинэн быйыл өрөспүүбүлүкэҕэ 38 оскуоланы өрөмүөннүөхтэрэ. Маныаха анаан федеральнай хааһынаттан 2,5 млрд. солк. тахса үп көрүлүннэ. Бу ааспыт сыллааҕар 2 млрд. солк. элбэх.
“Дойду бэрэсидьиэнэ “Биир ньыгыл Арассыыйа” баартыйа сийиэһигэр сорудаҕын иитинэн, 2023 сылга диэри өрөспүүбүлүкэ оскуолаларын хапытаалынай өрөмүөннэригэр уонна хааччыйыыга анаан 2 млрд. солк. тахса үбү ылыаҕа”, — диэн СӨ Ил Дархана Айсен Николаев эрдэ бэлиэтээн турар.
Балаҕан ыйын 1 күнүн көрсө Дьокуускай куорат 11 уонна улуустар 27 оскуолаларын өрөмүөннүөхтэрэ. Бу Саха-политиэхиньиичэскэй лиссиэй, 33-с, 10-с, 27-с, 23-с, 20-с, 21-с, 31-с нүөмэрдээх, Марха 1-кы нүөмэрдээх оскуолата, 36-с нүөмэрдээх оскуола итиэннэ А.Г. уонна Н.К. Чиряевтар ааттарынан Дьокуускайдааҕы национальнай гимназия. Ону тэҥэ Алдан, Амма, Булуҥ, Мэҥэ Хаҥалас, Муома, Нам, Ньурба, Сунтаар, Уус Алдан улуустарын оскуолалара.
2023 сылга үөрэх тэрилтэлэрин өрөмүөннүүргэ эбии 356 мөл. солк. көрүллүөҕэ. Чугастааҕы икки сылга 25 улууска уонна куорат уокуругар 58 оскуоланы өрөмүөннүүр үлэ былааннанар. Ыйыллыбыт эбийиэктэргэ тутар-таҥар үлэҕэ “суол каартатын” номнуо оҥорбуттар.
2023 сыллааҕы сайаапкалары СӨ Үөрэҕин уонна билимин министиэристибэтэ бу сыл кулун тутар 15-30 күннэригэр ылыаҕа. Барыллаан ааҕыынан номнуо 57 эбийиэги киллэрбиттэр. Сүнньүнэн тутар-таҥар үлэҕэ бэлэм бырайыактыыр-симиэтэлиир докумуоннаах уонна судаарыстыбаннай эспэртиисэттэн түмүгү ылбыт үөрэх кыһалара хапсаллар.
Санатан эттэххэ, “Оскуола систиэмэтин саҥардыы” бырагыраама “Үөрэҕи сайыннарыы” РФ судаарыстыбаннай бырагырааматын иитинэн 2026 сылга диэри үлэлиир. Быйыл тохсунньуга РФ Үөрэҕириитин министиэристибэтэ уонна СӨ Бырабыыталыстыбата эрэгийиэн бүддьүөтүгэр федеральнай субсидияны көрүү туһунан сөбүлэҥҥэ илии баттаспыттара.
2026 сылга диэри өрөспүүбүлүкэҕэ баар хапытаалынай өрөмүөнү эрэйэр 226 оскуоланы барытын хабар былааннаахтар.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыскаҕа Мария ВАСИЛЬЕВА (СИА) түһэриитэ