“Быйыл Японияҕа ыытыллыахтаах Олимпийскай оонньуулар буолаллар дуо, сахалартан кимнээх кыттыахтарай?”, — диэн быһа сибээс кэмигэр көрөөччү төлөпүөннээн СӨ физическэй култууратын уонна спордун миниистирэ Иннокентий Григорьевтан чопчуласта.
— Олимпиада боппуруоһунан билигин кэпсэтии бара турар. Норуоттар икки ардыларынааҕы Олимпийскай кэмитиэт уонна Токиотааҕы тэрийэр кэмитиэт иһитиннэрэллэринэн, Олимпиада ыытыллара чуолкайдан турар. Спортсменнар, дойдулар бэлэмнэнэ сылдьаллар. Билигин Олимпиада көрөөччүлээх дуу, көрөөччүтэ суох дуу барар боппуруоһун быһаара сылдьаллар. Сотору кэминэн биллиэҕэ.
Аҕыйах хонуктааҕыта Ил Дархан таһымыгар олимпийскай бырагыраамаҕа киирэр спортсменнар уонна кинилэри үбүлээһин туһунан улахан мунньах ыытыллыбыта. 14 спортсмен күүскэ бэлэмнэнэ сылдьар. Кинилэр кэккэлэригэр Сардаана Трофимова, Василий Егоров, тустууктарбыт эмиэ бары күүскэ бэлэмнэнэллэр. Чэпчэки атлетикатын федерацията 10 эрэ киһини киллэрэргэ сорудах биэрэн турар. Ол иһин билигин биирдиилээн үлэ бара турар. Сардаана Трофимова олимпийскай нуорманы толорбута. Ол гынан баран, уон спортсмен кэккэтигэр киирэр эбэтэр эбии квота ылар туһугар үлэлэһэбит. Табылыннаҕына Олимпиадаҕа кыттыахтаах. Атын спортсменнар олимпийскай сүүмэрдээһини ааһа сылдьаллар, — диэн миниистир хоруйдаата.
Людмила ПОПОВА, “Саха сирэ” хаһыат, edersaas.ru
Хаартыска: twitter.com/BelarusMID