Бүгүн киэһэ Ил Дархан Айсен Николаев «Якутия 24» телеханаалга атырдьах ыйын түмүгүн оҥордо.
Аҕа баһылык, бастатан туран, ыйдааҕы түмүгү оҥоруутун ойуур баһаарын бохсуу курдук сытыы боппуруостан саҕалаата.
— Быйылгы сылга ойуур баһаарын 13 төгүл аччаттыбыт. Бу үлэ эрэгийиэннээҕи уонна федеральнай миэрэлэри ылыы, ол иһигэр ойууру харыстааһыҥҥа үбүлээһин аҕыс төгүл улааппытын кытта ыкса сибээстээх. Былырыын ойуур баһаарыгар 573 тыһыынча иэннээх сир уокка былдьаммыта. Ол иһин быйыл Авиалесоохрана уонна Якутлесресурс тэрилтэлэр үлэһиттэрин ахсаанын элбэппиппит. 170-тан тахса тиэхиньикэ үлэлээтэ. Үс саҥа авиаотделение тэриллэн, биэс төгүл кэтээн көрүү ситиһиилээх буолла. Онон быйылгы сылга өрөспүүбүлүкэ ойуур баһаарын бохсууга толору бэлэмнээх көрүстэ.
Маны таһынан, ыам ыйыгар-бэс ыйыгар ардаҕы аҕалыыга ыытыллыбыт үлэ көдьүүстээҕин көрдөрдө. Маны таһынан, РФ Бырабыыталыстыбатын премьер-миниистирэ Михаил Мишустин ыыппыт мунньаҕар федеральнай Авиалесоохрана үлэһиттэрин Уһук Илиҥҥэ 300 киһиэхэ тиийэ элбэтэри туруорсубуппут. Бу боппурос туруутун төрүөтэ – кэккэ боломуочуйа, ол иһигэр дэлби тэптэрии, икусственнай ардаҕы түһэрии федеральнай ыстаапка бааллар. Эһиил Саха сиригэр бу боломуочуйаҕа көрүллэр исписэлиистэртэн 50-60 үлэһит кэлэн ойуур баһаарын бохсуу үлэтигэр кыттыһыаҕа, — диэн бэлиэтээтэ Айсен Николаев атырдьах ыйынааҕы түмүгү таһаарар этиитигэр.
Елена ПОТОЦКАЯ, “Саха сирэ” хаһыат.
Хаартыска — СИА.