Мииринэйгэ Ньиэп-гаас форумун ыытыы ньиэп уонна гаас бырамыысыланнаһын тэтимин үүнүүтүгэр олоҕурбута чахчы. Бу туһунан эрэгиийэн үбүн миниистирэ Валерий Жондоров “төгүрүк остуол” кэмигэр иһитиннэрдэ.
“Быйыл ньиэби хостооһун тэтимэ үрдүк – 14 мөлүйүөн туонна. Ис эрэгийиэннээҕи бородуукта 20 бырыһыанын ньиэп-гаас бырамыысыланнаһын бородууксуйата ылар. Бу өрөспүүбүлүкэҕэ нолуок киириитигэр суолталаах. Саха сиригэр 10 анал хампаанньа баар – маныаха 2018 сылга хааһынаҕа 23 млрд солкуобай нолуок киирбитэ. 2019 сыл бүтүүтэ “Сибиир күүһэ” киирдэҕинэ гааһы хостооһун 4 мөлүйүөнтэн 20 мөл. кубометрга тиийэ улаатыа”, — диэн Валерий Жондоров эттэ.
“Төгүрүк остуол” кыттыылаахтара Саха сирин арҕаа өттүгэр ньиэп-гаас сайдыытын кэскилин, ньиэби уонна гааһы хостуур тэрилтэлэр федеральнай, эрэгийиэн уонна олохтоох бүддьүөттэргэ нолуокка киллэриилэрин, былаас уорганнара бырамыысыланнас бу салаатын тэрилтэлэрин кытта бииргэ үлэлээһиннэрин ырыттылар.
Тэрээһиҥҥэ “Газпром” ПАУо, “Роснефть” ПАУо НК, “ТЮНГД” ХЭТ, “ИНК” ХЭТ, “ЯТЭК” ПАУо, “РНГ” АУо, “АЛРОСА” АК, “АЛРОСА-Газ” АУо, “Сахатранснефтегаз” АУо, “Туймаада-Нефть» АУо НК, “САХАТЭК” АУо, “Якутгазпроект ХЭТ”, научнай тэрилтэлэр, нолуок управлениета, норуот дьокутааттара, Наука академията кытыннылар.
Дьулус Борочков