Бэлиитикэ Маны аах

Быйыл национальнай бырайыактарынан 27 саҥа эбийиэк киириэҕэ

Саха сиригэр бу сылга национальнай бырайыактар чэрчилэринэн 44 эрэгийиэннээҕи бырайыак былааннаммыта. Ол иһигэр 27 саҥа эбийиэк тутуллуохтаах, икки эбийиэккэ капитальнай өрөмүөн бара турар. Бу туһунан СӨ бырабыыталыстыбатын бэрэссэдээтэлэ Андрей Тарасенко национальнай бырайыактары олоххо киллэрии мунньаҕар иһитиннэрдэ.

Билиҥҥи туругунан, өрөспүүбүлүкэ үрдүнэн 2958 хантараакка илии баттанан турар. Ити уопсай былаантан 86 % ылар. Бу сылга национальнай бырайыактарынан барыта 3199 хантараак түһэрсиллиэхтээх.

Мунньахха бырайыактар үгүстэрэ былаан быһыытынан баран иһэллэрин бэлиэтээтилэр. Сорох эбийиэктэргэ куонкурус түмүгэ уонна үбүлээһиннэрэ кэтэһиннэриилээх буолан, болдьохторун уһатан биэрэр кутталлаахтар. Билигин итиннэ үлэ бара турар. Бырабыыталыстыба хамыыһыйатын мунньаҕар бырайыактар бары көрүллүбүттэрэ.

Билигин түөрт национальнай бырайыактар бырабыыталыстыба сүрүн болҕомтотугар тураллар. Ол курдук, бастакытынан, “Куттала суох хаачыстыбалаах суоллары оҥоруу” бырайыак чэрчитинэн ыытыллар интеллектуальнай тырааныспар систиэмэтин киллэрии. Иккиһинэн, экология бырайыагынан киириэхтээх бөҕү-саҕы хомуйууга туһуламмыт эбийиэк докумуоннарын оҥоруу, үсүһүнэн, “Точка роста” анал бырайыакка кылаастары оборудованиенан, үөрэнэр тээбириннэринэн хааччыйыы, төрдүһүнэн – доруобуйа харыстабылын эбийиэктэригэр биир ситимнээх цифровой систиэмэни киллэрии. Бу түөрт бырайыагы бырабыыталыстыба хамыыһыйата хонтуруолга ылла.

Аграфена КУЗЬМИНА.

0
0
Telegram @edersaas20