Быйыл култуура 20 тэрилтэтэ субсидияны ылыаҕа

Ол курдук, Горнай улууһугар сынньалаҥ киинэ компьютернай тиэхиньикэлэннэ, саҥа миэбэллэннэ уонна уот-күөс, тыас-уус тэрилинэн хааччылынна. Мэҥэ Хаҥалас улууһа аппаратура ылбыта уонна култуура комплексын өрөмүөннээбитэ, Чурапчыга аактабай саалалара өрөмүөннэммитэ уонна светодиоднай экраннаммыттара.

Бырайыагы Саха сиригэр иилээччи-саҕалааччы Ольга Балабкина, култуура тэрилтэлэригэр материальнай-тэхиньиичэскэй баазаларын бөҕөргөтөргө уонна сайыннарарга куонкурустаһан, олохтоох бүддьүөккэ субсидияны ыларга үлэ 2017 сыллаахтан СӨ Култуура уонна духуобунай сайдыы министиэристибэтинэн саҕаламмыта.

2017-2020 сылларга өрөспүүбүлүкэҕэ барыта 126 култуура дьиэтэ саҥардылынна, ол иһигэр, 25 — 2020 сылга. 2020 сылга субсидия уопсай суумата 30,5 мөл. солк. тэҥ. Ол иһигэр федеральнай бүддьүөттэн 26,8 мөл.солк. 2021 сылга уопсайа 23,6 мөл.солк. субсидияны култуура 20 тэрилтэтэ ылыаҕа. Маныаха биир сүрүн ирдэбилинэн, муниципалитеттар үбүлээһиҥҥэ кыттыылара буолар. Ону сэргэ, биллэн турар, тэрилтэлэр өрөспүүбүлүкэтээҕи, Арассыыйатааҕы күрэстэргэ ситиһиитин, уус-уран самодеятельноска кыттыы улаатыытын, нэһилиэнньэҕэ сынньалаҥы тэрийэргэ идэлээх үлэһиттэр ыстаакка балларын көрдөрүөхтээхтэр.

Чурапчыттан «Биир ньыгыл Арассыыйа» баартыйа улуустааҕы салаатын толорооччу сэкирэтээрэ Петр Гуляев айар үлэҕэ табыгастаах эйгэни, усулуобуйаны тэрийэр наадатын бэлиэтиир. «Аччыгый куораттарга уонна нэһилиэнньэлээх пууннарга култуура тэрилтэлэрин судаарыстыба таһымыгар өйүүллэрэ биһигини үөрдэр. Элбэх сыллар усталарыгар бу үлэни, култуура судаарыстыба төрүтэ буолар диэн дьиҥ чахчы өйүүр уонна ол туһугар сыралаһар энтузиастар көҕүлээн, сайыннаран кэлбиттэрэ, — диэн кини этэр.

2021 сылга федеральнай субсидияны култуура кииннэрэ: Бороҕон (Уус Алдан), Бэрдьигэстээх (Горнай улууһа), Булуҥ (Таатта улууһа), Эмис (Амма), Быракаан (Үөһээ Бүлүү улууһа), Харбала-2 (Чурапчы), Абый (Абый улууһа), Граф Биэрэгэ (Нам), Тулагы (Дьокуускай куорат уокуруга), Тиксии (Булуҥ улууһа), Кириэс Халдьаайы (Томпо), Элгээйи (Сунтаар), Ньурба (Ньурба оройуона), Золотинка (Нерюнгри), Төҥүлү (Мэҥэ Хаҥалас), Ленинскэй (Алдан оройуона) ылыахтара.