Быйыл тыа хаһаайыстыбатын сайдыытыгар барыта 12,5 млрд солк. көрүллүбүтүттэн 3,1 млрд үп үүтү туттарыыга уонна үрүҥ аһы оҥорууга туһуламмыт.
Бу туһунан СӨ Бырабыыталыстыбатын отчуотун чэрчитинэн Саха НКИХ канаалларынан вице-премьер Михаил Никифоров кэпсээтэ.
“Тыа сирин сайыннарыыга Ил Дархан тус бэйэтэ үгүс үлэни ыытар. Ил Түмэн дьокутааттара эмиэ күүскэ өйүүллэр. Быйыл тыа хаһаайыстыбатыгар хаһан да өтөрүнэн көрүллүбэтэх үгүрүө үп ыытыллыаҕа. Биллэн туран, тыа дьонун дохуота үрдүөҕэ, табаары оҥорооччулар бородууксуйалара хаҥыаҕа”, — диэтэ Михаил Никифоров.
Тыа хаһаайыстыбатын миниистирэ Александр Атласов бэлиэтээбитинэн, быйылгы былаан быһыытынан 62 тыһ. туонна үүт туттарыллыахтаах. 6,5 млрд солк. тыа хаһаайыстыбатын оҥорон таһаарыытыгар туһуланыахтаах. Ити ааспыт сыллааҕар 14%- нан элбэх. 1,3 млрд солк. тахса харчы кэтэх хаһаайыстыбылаахтарга анаммыт.
Итини сэргэ министр Александр Атласов хотоннору, көтөр фабрикатын производственнай объектарын тутуутугар, бурдугу уонна оҕуруот аһын үүннэриигэ, тыа хаһаайыстыбатын уонна промышленнай бородууксуйаны таҥастааһыҥҥа, агропромышленнай комплекс материальнай- техническэй базатын саҥардыыга 1 млрд солк. тахса үп көрүллэрин иһитиннэрдэ.
СӨ Ил Дарханын уонна Бырабыыталыстыбатын Пресс-сулууспата