Үгэс буолбут «Хонуу күнэ» өрөспүүбүлүкэтээҕи тэрээһин быйыл сайын Амма улууһун Покровкатыгар ыытыллыаҕа. Бу күн оҕуруот аһынан, үүнээйинэн дьарыктанар фермердэр мустан үлэ үөрүйэҕин атастаһыахтара, семинардарга, «төгүрүк остуолларга» кыттыахтара.
Аграфена КУЗЬМИНА, «Саха сирэ» хаһыат, https://edersaas.ru/
СӨ бырабыыталыстыбатын бэрэссэдээтэлин бастакы солбуйааччы – тыа хаһаайыстыбатын миниистирэ Петр Алексеев бэлиэтииринэн, Покровка олохтоохторо сир үлэтигэр улахан уопуттаахтар. «Покровкалар, эһиги, бурдугу үүннэриигэ улахан үөрүйэхтээххит. Ону дьоҥҥо-сэргэҕэ кэпсээҥ, кинилэртэн эмиэ үөрэниҥ», — диэн Покровка олохтоохторун кытары көрсүһүүгэ Петр Николаевич тоһоҕолоон эттэ.
Санатар буоллахха, ааспыт нэдиэлэҕэ Ил Дархан Егор Борисов салайааччылаах бөлөх Покровкаҕа баран «Амма» АУо үлэһиттэрин, Амма улууһун бааһынай хаһаайыстыбаларын кытары көрсүбүтэ. Олунньуттан саҕалаан «Амма» ТХПК моҥкуруут баран, саҥа акционернай уопсастыба тэриллибитэ. Тэрилтэ урукку иэһин сабыыга судаарыстыба өттүттэн үгүс көмө барда. Онон билигин саҥа акционернай уопсастыба үлэтин хайдах саҕалыыра үлэһиттэртэн бэйэлэриттэн улахан тутулуктаах. Ол иһин, маннык улахан тэрээһин ыытыллара саамай сөп.
Манна даҕатан эттэххэ, нэһилиэк сайдыытыгар өссө биир улахан хамсааһынынан бурдук үүннэриитигэр агрокластер тэрийиитэ буолуоҕа. Билигин бырайыак концепцията оҥоһуллан бүтэн эрэр. Ону олоххо киллэрии эмиэ олохтоохтортон быһаччы тутулуктаах буолуоҕа.
Аграфена КУЗЬМИНА, «Саха сирэ» хаһыат, https://edersaas.ru/