Саҥа сылга киирэн баран, төһө үлэ уонна бырааһынньык күннэрэ баалларын РФ Үлэҕэ министиэристибэтэ чопчулаата.
Сыл 365 күнүттэн 247 күнэ -– үлэ күнүгэр, 104 күн өрөбүллэргэ түбэһэллэр. Онтон 14 күҥҥэ бырааһынньык күннэрэ биллэриллэллэр.
Олунньуга Дойдуну көмүскээччи күнүгэр биир күн -– олунньу 23 күнүгэр сынньаныахпыт.
Дьахталлар аан дойдутааҕы күннэригэр кулун тутар 6-8 күннэрэ -– бырааһынньык күннэрэ. Кулун тутар 5 күнэ (субуота) биир чааһынан кылгас оробуочай күнүнэн буолуоҕа.
Ыам ыйын бырааһынньыктара муус устар 30 күнүттэн (субуотаттан) ыам ыйын 3 күнүгэр диэри салҕаныахтара. Ыам ыйын 4-6 күннэрэ -– үлэ күннэрэ.
Кыайыы күнүгэр Арассыыйа олохтоохторо ыам ыйын 7-10 күннэригэр, 4 күн сынньаныахтара.
Бэс ыйын 11-13 күннэригэр Арассыыйа күнүн бырааһынньыга бэлиэтэниэ.
Сэтинньигэ Норуот сомоҕолоһуутун күнүн бырааһынньыгар 3 күннээх өрөбүл, сэтинньи 4-6 күннэрэ түбэһэллэр.
Онтон 2022 сыл бүтэһик күнэ -– ахсынньы 31 күнэ субуотаҕа түбэһэринэн, сынньалаҥ күнүнэн буолуоҕа.
Надежда ЕГОРОВА, «Саха сирэ», edersaas.ru