2019 сылга Саха сиригэр 60 социальнай-култуурунай эбийиэк үлэҕэ киирэрэ былааннанар.
edersaas.ru
Бу туһунан сыл саҥатыгар өрөспүүбүлүкэ бырабыыталыстыбатын вице-премьерэ Кирилл Бычков суруналыыстары кытары көрсүһүүтүгэр иһитиннэрдэ. Бырабыыталыстыба бэрэссэдээтэлин солбуйааччы ааспыт сыл түмүгүн билиһиннэрэн туран, тутуу, инвестиция, урбаан, сибээс уонна инновация салааларыгар, тас дойдулары кытта сибээскэ сыһыаннаах быйыл олоххо киириэхтээх былааны кэпсээтэ.
Былааҥҥа киирбит 60 социальнай эбийиэктэн улахан аҥара — оҕо уһуйаана уонна оскуола. Ол курдук, 21 оҕо саада, 10 оскуола, эдэр исписэлиис олороругар 9 дьиэ, 6 элбэх функциялаах култуура уонна спорт киинэ, 5 спорт, 3 култуура эбийиэгэ, 210 куойкалаах өрөспүүбүлүкэтээҕи онкологическай диспансер тутулла тураллар.
Хаарбах туруктаах дьиэлэри көтүрүү кэм ирдэбилинэн буолла. Кирилл Бычков бэлиэтииринэн, өрөспүүбүлүкэ саахалланар туруктаах дьиэтин пуондата элбэҕинэн Арассыыйаҕа бастакы миэстэҕэ турар.
— 2017 сылга диэри 3586 элбэх кыбартыыралаах хаарбах дьиэ ахсааныгар киирбит эргэ дьиэни көтүрүүгэ, быйылгыттан саҥа бырагыраама оҥоһуллуоҕа. Кэккэ чэпчэтиинэн туһанар дьону дьиэнэн хааччыйыы боппуруоһугар саҥа торумнар олоххо киириэхтэрэ. Ол курдук, 2018 сылга 200 тулаайах оҕону олорор дьиэнэн хааччыйбыппыт. Бу сыыппара түөрт төгүл үрдүүрэ былааннанар. Маны тэҥэ эдэр ыаллары, бэтэрээннэри, инбэлииттэри олорор дьиэнэн хааччыйыыга үбүлээһин кээмэйэ 35-50% үрдүөҕэ. Эйэлээх кэмҥэ бойобуой дьайыыларга сылдьыбыт дьону олорор дьиэнэн хааччыйыы үбүлээһинэ икки төгүл, оттон элбэх оҕолоох дьиэ кэргэттэргэ — биэс төгүл үрдүөҕэ, — диэн Бырабыыталыстыба бэрэссэдээтэлин солбуйааччы иһитиннэрдэ.
Елена ПОТОЦКАЯ, «Саха сирэ», edersaas.ru
Хаартыска: интэриниэттэн