Үлэ хаамыытын куорат мэрэ Евгений Григорьев Ил Дархан Айсен Николаевы кытары көрдүлэр-иһиттилэр.
Быйыл 36 уулуссаҕа уопсайа 50-ча км суол өрөмүөннэниэхтээх. 23 эбийиэгинэн үлэ ыытылла турар. Оттон атын сирдэринэн бэлэмнэнии үлэлэрэ ыытыллаллар. Бүтүн Арассыйатааҕы норуот фрона үлэни хонтуруоллаан, бэдэрээтчиттэр алҕастарын тута көннөрүнэллэр.
Өрөспүүбүлүкэ баһылыга үлэ хаамыытын Халтурин уулуссаттан саҕалаата. Бу манна Кальвицаттан саҕалаан Лермонтов уулуссатыгар диэри килэмиэтир аҥаара курдук суол оҥоһуллар. Үлэ кыраапык быһыытынан баран иһэр.
Салгыы Айсен Николаев Покровскайдыыр Эргэ суол өрөмүөннээһин үлэтин билистэ. Баһылык маны таһынан Пригороднайга сылдьан Набережнай, Совхознай уулуссаларын көрдө.
СӨ Ил Дарханын уонна бырабыыталыстыбатын пресс-сулууспата