2020 сылга Саха сиригэр бүтэһик сыллардааҕар саамай элбэх суол уонна уулусса өрөмүөннэннэ, магистраль тутуута түмүктэннэ. Бу туһунан «Саха» НКИХ ханаалын «Якутия. 20 лет в 21 веке» бырагырааматыгар «Сахатранснефтегаз» генеральнай дириэктэрэ Алексей Колодезников кэпсээтэ. Кини бу сыл кулун тутарыгар диэри СӨ Бырабыыталыстыбатын бэрэссэдээтэлин бастакы солбуйааччынан үлэлээбитэ, Саха сиригэр «Куттала суох уонна хаачыстыбалаах суоллар» национальнай бырайыак олоххо киириитин салайбыта.
«Ил Дархан Айсен Сергеевич Николаев туруорбут үлэтин эрэһиимэ уонунан сыллар усталарыгар тутуллубут суоллар түргэнник оҥоһуллалларын ситистэ. Былырыын отут сыл күүтүллүбүт «Кэбээйи» суола арыллыбыта. Итиэннэ сүүрбэ сыл устата оҥоһуллубут «Амма» суолун Амма-Уус Майа учаастага тутуллубута», — диэн Алексей Колодезников кэпсээтэ.
Кини тырааныспар инфраструктуратын сайдыыта Саха сирин олоҕор-дьаһаҕар үтүө өттүнэн дьайарын бэлиэтээтэ. «Билигин биһиги сылы эргиччи Магадаҥҥа айанныахпытын сөп. «Лена», «Халыма», «Бүлүү» федеральнай трассаларга улахан уларыйыылар буоллулар. Ону тэҥэ муниципальнай суолларга эмиэ. Дьокуускайга эмиэ суол бөҕөтө оҥоһулунна. Ааспыт сылга киин куораппытыгар 25 км суол оҥоһулунна, ол иннинээҕи сылга — өссө 25 км этэ. Оттон быйыл 48 км суол оҥоһуллара былааҥҥа баар», — диэн Алексей Колодезников эттэ.
«Якутия. 20 лет в 21 веке» бырайыакка Арассыыйа биллэр видеоблогера уонна айанньыта Богдан Булычев Саха сиригэр суол оҥоһуллан, автотуристарга абыраллааах буолбутун туһунан кэпсээтэ.
«Биһиги Саха сиригэр аан бастакыбытын 2015 сыллаахха кэлэ сылдьыбыппыт. «Амур» федеральнай трассаттан «Ленаҕа» киирэн баран тута бадарааҥҥа түспүппүт. Суолу барытын уу ылбыт этэ. Оттон билигин бу суол оҥоһуллубута, аспаалламмыта бэртээхэй буолбут. Өрөспүүбүлүкэ суола биллэ тупсубут. Оттон Дьокуускайга саҥа суоллар оҥоһуллубуттар уонна олус элбэх ууулуссаҕа өрөмүөн барбыт», — диэн Богдан Булычев интервьютугар кэпсээтэ.
СӨ Тырааныспарга уонна суол хаһаайыстыбатыгар министиэристибэтин дааннайдарынан, бүтэһик сүүрбэ сылга (2000-2020 сылларга) Саха сиригэр 1518 км суол оҥоһуллубут уонна 4160 км өрөмүөннэммит. 2020 сылга өрөспүүбүлүкэҕэ 535 км суол ситимэ оҥоһуллубут уонна өрөмүөннэммит. Бу — Саха сирин устуоруйатыгар саамай үрдүк көрдөрүү. 2024 сыл бүтүөр диэри өссө 1063 км суол оҥоһуллара, өрөмүөннэнэрэ былааннанар.