Быйыл Дьокуускай куорат уулуссаларын саҥардыыга 632 мөл. солк көрүлүннэ

Дьокуускай куорат уулуссаларын саҥардан оҥоруу хаһыс да сылыгар барда. Үгүс уулусса өрөмүөннэннэ. Урут, кырдьык, массыына стойкаларын алдьатар уулуссалар бааллар этэ. Олор аҕыйаан иһэллэрэ суоппардары үөрдэр.

Александр Тараосв, “Саха сирэ” хаһыат, https://edersaas.ru/

Быйыл уулуссаны оҥорууга Дьокуускай куорат бүддьүөтүттэн 632 мөл. солк көрүлүннэ. Маҥнайгы уочаратынан Окружной шоссе (Өктөөп 50 сыла автострада – Бүлүүлүүр суол учаастага) саҥардыллыаҕа. Кальвица (Дзержинскэй – Жорницкай учаастага), Чернышевскай уонна Хабаров (Кулаковскай – Чиряев учаастага), Ломоносов (Петровскай – Октябрьскай учаастага), Жорницкай (Семен Данилов – Окружной шоссе) уулуссаларыгар хапытаалынай өрөмүөн барыаҕа. Итини тэҥэ, Кальвица, Жорницкай уонна Пирогов уулуссалар быһа охсуһуулара саҥардыллыаҕа. Чиряев (Дзержинскэй – Хабаров учаастага) уулуссатыгар уонна Медкииҥҥэ киирии суолга хапытаалынай өрөмүөн оҥоһуллуоҕа. Барыта 7,2 км уһуннаах уулусса өрөмүөннэниэҕэ.

Итини тэҥэ, Автодорожнай уулуссаҕа, Халтурин, Билибин, Дежнев, Каландаришвили, Кузьмин, Стадухин аатынан уулуссаларга саҥардыы үлэтэ салгыы ыытыллыаҕа. Былырыын оҥоһуллубут уулуссалары тупсаран биэриэхтэрэ, лаампалары ыйыахтара.

Александр Тараосв, “Саха сирэ” хаһыат, https://edersaas.ru/