Саха Өрөспүүбүлүкэтигэр «Тыа сирин территорияларын бигэтик сайыннарыы» федеральнай бырагырааманан 2014-2018 сс. федерацияттан 5 млрд, өрөспүүбүлүкэ бүддьүөтүттэн 3 млрд солк. көрүлүннэ.
edersaas.ru
Бу үпкэ тирэҕирэн, 2 тыһ. 36 олорор дьиэ, ол иһигэр 1 тыһ. 341 эдэр ыалларга олорор дьиэ, икки оскуола итиэннэ култуура, спорт, доруобуйа харыстабылын эбийиэктэрэ тутулуннулар. Ити иһигэр уон үс нэһилиэнньэлээх пууҥҥа 163,898 км гааһы үллэрэр ситим, отут үс нэһилиэнньэлээх пууҥҥа 282,185 км усталаах уу ситимэ итиэннэ былаһааккалары кэлим оҥоруу сэттэ бырайыага, 12 ФАП, олохтоох көҕүлээһини граннарынан өйөөһүн сэттэ бырайыага үлэҕэ киллэрилиннэ.
Ааспыт 2018 сылга федерацияттан 408 мөл. 876 тыһ., өрөспүүбүлүкэ бүддьүөтүттэн 386 мөл. 497 тыһ. солк көрүллэн, улахан үлэ-хамнас тэрилиннэ. Ол курдук, 26 тыһ 776 кв. м иэннээх 387 олорор дьиэ, Томпо улууһун Кэскилигэр ФАП тутулуннулар. Чурапчы улууһун Туора Күөл уонна Чурапчы сэлиэнньэлэригэр, Хаҥалас Нөмүгүтүгэр 37,584 км усталаах гаас ситимэ тардылынна, Ленскэй Нуотаратыгар, Өлүөхүмэ II Нөөрүктээйитигэр, Бүлүү Тиэрбэһигэр, Нам Булууһугар, Таатта Хара Алданыгар, Үөһээ Бүлүү Боотулуутугар уонна Баҕадьатыгар, Мэҥэ Хаҥалас Төҥүлүтүгэр холбоон 61,749 км усталаах уу ситимэ тардылынна. Мэҥэ Хаҥалас Петровкатыгар кыбартаал уонна Сунтаарга “Саха АССР 100 сыла” микро-оройуон тупсарыллан оҥоһулуннулар. Маны таһынан, олохтоох көҕүлээһини граннарынан өйөөһүн чэрчитинэн, Намҥа спортивнай былаһаакка, Амма Мээндигитигэр “Олох историята” сквер, Чурапчы Хатылытыгар уонна Одьулуунугар спортивнай былаһааккалар, Горнай Маҕараһыгар култуура уонна сынньалаҥ паарката, Өлүөхүмэ Саҥыйахтааҕар чосуобуна, Үөһээ Бүлүү Кэнтигэр фонтаннаах сквер оҥоһулуннулар.
Быйыл 720 мөл. солкуобай көрүллэн, 28 тыһ. кв. м иэннээх олорор дьиэ, Амма Сулҕаччытыгар ФАП, Хаҥалас Малдьаҕарыгар, Нам Хатаһыгар кэлим тутуу икки эбийиэгэ тутуллуохтара, Үөһээ Бүлүү, Ньурба, Томпо, Өлүөхүмэ, Сунтаар улуустарыгар уу ситимэ тардыллыаҕа.
Раиса СИБИРЯКОВА, «Саха сирэ» хаһыат, edersaas.ru