Кулун тутар 11 күнүгэр Бырабыыталыстыба Бэрэссэдээтэлин солбуйааччы Денис Белозеровка видеоконференц-сибээһинэн ыытыллыбыт сүбэ мунньахха сааскы ыһыыга бэлэмнэнии тэрээһинэ көрүлүннэ.
edersaas.ru
Сүрүн иһитиннэриини тыа хаһаайыстыбатын миниистирин солбуйааччы Николай Афанасьев оҥордо. Быйыл саас өрөспүүбүлүкэ үрдүнэн ыһыы 48,7 тыһ. гектарга ыытыллыаҕа. Ол иһигэр, бурдук 9,4 тыһ. гектарга, сүөһү аһылыгар аналлаах култуура 30,2 тыһ. гектарга (биир сыллаах от 18,2 тыһ. гектарга, элбэх сыллаах от – 11,8 тыһ. гектарга) ыһыллыа, хортуоппуй 7,4 тыһ. гектарга, аһаҕас буорга үүннэриллэр оҕуруот аһа 1,7 тыһ. гектарга олордуллуо. Онон аны күһүн 11,3 тыһ. т бурдугу, 77,2 тыһ. т хортуоппуйу, 34,4 тыһ. т оҕуруот аһын хомуйар сорук турар. Ыһыы хампаанньатыгар бэлэмнэнии чэрчитинэн, хаһаайыстыбалар сиэмэни уонна минеральнай уоҕурдууну хааччыйарга дуогабар түһэрсэ сылдьаллар. Барыта 1616 т бурдук сиэмэтэ, 3050 т сүөһү аһылыгын сиэмэтэ наада. Сиэмэ сүрүннээн Тюмень уобалаһыттан аҕалыллыахтаах.
Ыһыы үлэтин кэмигэр уонна хаачыстыбалаахтык ыытарга “2020-2024 сс. тыа хаһаайыстыбатын сайдыыта итиэннэ тыа хаһаайыстыбатын бородууксуйатын, сырье уонна ас-үөл ырыынагын сүрүннээһин” судаарыстыбаннай бырагыраама чэрчитинэн улуустарга тустаах көмө оҥоһуллар. Ол курдук, бурдугу үүннэрии ороскуотун сорох чааһын толуйарга көрүллүбүт 100 мөл. солк. субсидия куонкурус түмүгүнэн бэриллиэхтээх. Куонкурус кулун тутар 20 күнүттэн муус устар саҕаланыар диэри ыытыллыаҕа. Тыа хаһаайыстыбатын култууратын (бурдук, хортуоппуй) элита кылаастаах сиэмэтин атыылаһыы ороскуотун сороҕун толуйарга 16,4 мөл. тыырыллан, эмиэ куонкуруһунан бэриллиэҕэ. Муниципальнай улуустар уонна куораттааҕы уокуруктар кэккэ судаарыстыбаннай боломуочуйаларын толороллоругар аһаҕас буорга үүннэриллэр оҕуруот аһын олордууну өйөөһүҥҥэ 25,3 мөл. солк., хортуоппуйу үүннэриини өйөөһүҥҥэ 60,7 мөл. солк. субвенция ананан, 70 %-нара тиэрдиллибит.
Улуустар дьаһалталарын иһитиннэриилэрин кэнниттэн сүбэ мунньаҕы түмүктүүрүгэр Денис Белозеров улуустар дьаһалталара ыһыыга бэлэмнэнии, сиэмэнэн уонна минеральнай уоҕурдуунан хааччыллыы боппуруостарыгар министиэристибэни кытары бииргэ үлэлииллэригэр эттэ.
Раиса Сибирякова, «Саха сирэ» хаһыат, edersaas.ru