Маны аах Үөрэх уонна наука

Быйыл Арктикатааҕы култуура уонна искусство институтугар бүддьүөт миэстэтэ эбиллибит

Быйыл Арктикатааҕы култуура уонна искусство судаарыстыбаннай институтугар бакалавр уонна исписэлиис хайысхаларыгар миэстэ 183-кэ диэри эбилиннэ. Ону тэҥэ, эрэгийиэн үөрэҕин уонна култууратын тэрилтэлэригэр үлэҕэ киирэргэ мэктиэлээх СӨ Бырабыыталыстыбатыттан 47 тус сыаллаах миэстэ көрүллэрэ былааннанар.

edersaas.ru

Инньэ гынан, айар уонна креативнай исписэлиистэргэ ирдэбил сыллата үрдээн иһэр. Итини сэргэ, бүддьүөт миэстэтэ эбиллиитэ Арктикатааҕы култуура уонна искусство судаарыстыбаннай университета РФ Үөрэҕин министиэристибэтин үрдүк үөрэхтэрин ортолоругар көрдөрүүтэ уонна институт эриэйтинэ үрдээһинин кытта сибээстээхтэр.

Ордук элбэх миэстэни прикладной информатика уонна библиотечнай-информационнай үлэ хайысхаларыгар үллэрбиттэр, туһааннааҕынан 20 уонна 25 миэстэ. Бу, АйТи салаатын идэтигэр ситиһиилээх буолар инниттэн сатабылын уонна билиитин үрдэтиэн баҕарар ыччат ордук сэҥээрэр буолбутуттан тутулуктаах. Ону тэҥэ, “Култуура” национальнай бырайыак олоххо кииритин иитинэн, бибилэтиэкэлэр араас саастаах уонна ирдэбиллээх дьоҥҥо анаан култуурунай-уопсастыбаннай эйгэлэргэ кубулуйдулар.

Арктикатааҕы култуура уонна искусство судаарыстыбаннай института быйыл өрүү үөрэххэ ылар хайысхаларын: актер искусствотын, балет педагогикатын, живопиһы, графиканы, хореографияны, музыкальнай педагогиканы, норуот художественнай култууратын, социальнай-култуурунай үлэни сэргэ, «пространственнай дизайн», «муода уонна текстиль», «декоративнай-прикладной искусство оҥоһуктарын дизайна», «аккомпаниатор», «педагог-вокалист» курдук саҥа бырагыраамаларга үөрэххэ ылар.

Санатан эттэххэ, институт үөрэххэ тутар хампаанньата бэс ыйын 20 күнүттэн үлэлиир. Айар хайысхаларга (творческие направления) докумуоннары тутуу от ыйын 11 күнүнэн, биир кэлим эксээмэнинэн (ЕГЭ) эрэ туттарсааччылартан от ыйын 24 күнүнэн түмүктэнэр. Ити туһунан Арктикатааҕы култуура уонна искусство судаарыстыбаннай институтун тутар хамыыһыйатын эппиэттиир сэкирэтээрэ Татьяна Петрова иһитиннэрэр.

 

Хаартыска: СИАтан.

0
0
Telegram @edersaas20