Быйыл Саха сирин үрдүнэн барыта 231 биэрэстэ суол оҥоһуллуоҕа. Ол иһигэр 48,5 км өрөспүүбүлүкэбит киинигэр Дьокуускай куоракка. Бу туһунан бүгүн Ил Дархан Айсен Николаев быһа биэриитин кэмигэр иһитиннэрдэ.
Бу сылга Дьокуускай куорат уулуссулара саҥардыллыбыттара. Айсен Николаев этэринэн, быйыл суоллары оҥорууга үлэ хаһааҥҥытааҕар да күүскэ ыытыллыбыт.
– Быйыл өрөспүүбүлүкэбит иһинээҕи суоллары уонна Дьокуускай куорат уулуссаларын саҥардыы хаһааҥҥытааҕар да күүскэ ыытылынна. Холобур, урукку сылларга Дьокуускайга 10 км суол оҥоһуллубута улахан ситиһии курдук көстөр эбит буоллаҕына, быйыл 48,5 км суолу оҥордубут. Бу үлэ куорат эрэ иһигэр буолбакка, куорат таһынааҕы бөһүөлэктэргэ эмиэ барда. Билигин сүрүннээн уулуссаларга уоту киллэрии үлэтэ бара турар, – диэн иһитиннэрэр кини.
Манна даҕатан эттэххэ, суолу оҥоруу “Куттала суох, хаачыстыбалаах суоллар” диэн национальнай бырайыагынан барар. Бу бырайыагынан бу сыл бүтүөр диэри 231,7 км оҥоһуллуохтаах, онон 2019 сылтан саҕалаан барыта 580 биэрэстэ эрэгийиэннээҕи суол өрөмүөннэниэхтээх. Билигин Амма, Умнас, Нам, Анаабыр, Яна, Мүрү суолларыгар үлэлэр бара тураллар. Ону сэргэ Уус Маайаҕа, Томпоҕо, Ленскэйгэ муосталар тутулла сылдьаллар. 2019 сылтан саҕалаан манна анаан бүддьүөттэн 13 млрд солкуобай көрүллүбүтэ. Ол иһигэр 10 млрд солкуобай – өрөспүүбүлүкэ бүддьүөтүттэн.
Аграфена КУЗЬМИНА