Бу күһүн саҥа үөрэх дьылыгар бары улуустарга, 110 оскуолаҕа “Точка роста” диэн гуманитарнай уонна цифровой хайысхалаах кииннэр арыллыахтара. Өрөспүүбүлүкэҕэ бу маннык кииннэри арыйыы 2019 сылтан саҕаламмыта, оччолорго киин ахсаана икки төгүл аҕыйах этэ.
—Бу аныгы, табыгастаах үөрэтэр кииннэр “Үөрэҕирии” Национальнай бырайыак чэрчитинэн арыллаллар. Үөрэнээччилэр наука, тиэхиникэ ситиһиилэригэр үөрэнэн, билэн-көрөн, талааннарын, дьоҕурдарын арыйар кыахтаналлар. Оттон учууталлар үөрэх аныгы технологияларын туһаналларыгар кыах биэрэр. Онон үөрэх хаачыстыбата үрдүүр, — диэн Айсен Николаев этэр.
“Точка роста” аһыллар оскуолаларыгар өрөмүөн оҥоһуллар, миэбэлинэн, анал тэриллэринэн, информатика, “ОБЖ”, технология, химия, биология биридимиэттэригэр цифровой лабораторияларынан хааччыллаллар. Саахыматтыыр сир, медиазона баар буолаллар. Манна уруоктар, эбии дьарыктар, уруогу таһынан дьарыктар буолаллар. Учууталлар квалификацины үрдэтэр анал кууруска үөрэнэллэр.
2-с №-дээх Жатай орто оскуолатыгар маннык киин 2020 сыллаахха арыллыбыта. Дириэктэр Нина Сачкова этэринэн, 380 үөрэнээччи бары бу анал кэбиниэттэргэ үөрэнэллэр. Оҕолор робототехника, медиастудия, 3D-моделирование, мультипликация, геоинформационнай технологиялар, көтөр аппарааттары бырагыраамалааһын, виртуальнай эйгэ оскуолата курдук дьарыктары сөбүлүүллэр.
2024 сылга “Точка роста” кииннэр өрөспүүбүлүкэ бары оскуолаларыгар арыллыахтаахтар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru